Elbasy kózdegen basty mindetterdi birlesip atqarsaq, tabysqa jetetinimiz sózsiz - mektep dırektory
ALMATY. 3 aqpan. QazAqparat /Názıra Eleýhan/- Elbasynyń bıylǵy Joldaýynda basty másele - áleýmettik jańarý ekenin basa aıtty.
Bizdi memlekettiń jańa áleýmettik saıasatynyń birinshi kezekte halyqtyń turmys jaǵdaıyn jaqsartýǵa baǵyttalǵandyǵy qýantty. M.Áýezov atyndaǵy №128 jalpy bilim beretin mektep dırektory Farıda Qabylbekova QazAqparat tilshisine bergen suhbatynda osylaı málim etti.
Onyń aıtýynsha, 2011 jyldyń 1 shildesinen bastap bıýdjet salasyndaǵy qyzmetkerlerdiń jalaqysy 30 paıyzǵa ósetindigi barlyq bıýdjet salasyndaǵy qyzmetkerler úshin qýantarlyq jaǵdaı bolmaq.
«Bıylǵy Joldaýda árbir qazaqstandyqtar úshin ǵumyrlyq bilim alý jeke maqsat bolý kerektiginiń basa aıtylǵandyǵy, kásiptik jáne tehnıkalyq bilimniń mazmunyn túbegeıli jańartý kózdelgendigi, bilim berý salasynda joǵary oqý oryndarynyń ınnovatsııalyq qyzmetke kóshýi, memleketten bonýstyq paıyzdar alý arqyly balalardyń bilim alýyna jaǵdaı jasaý kózdelgendigi kóńilimizden shyqty»,-deıdi ol.
«Sondaı-aq, «Balapan» baǵdarlamasynyń áli jalǵasyn tabatyndyǵy, 2020 jylǵa deıin 12 jyldyq bilim berý júıesine tolyq kóshý máselesi, 2015 jylǵa deıin elektrondyq oqytý 50 paıyzǵa, al 2020 jyly 90 paıyzǵa deıin ósetinin, elimizdiń túkpir-túkpirinde ashylǵan 20 ıntellektýaldyq mektep joǵary oqý ornyna daryndy balalardy daıyndaýdyń negizgi bazasy bolatynyn ashyp kórsetýi Elbasynyń bilim salasyna úlken nazar aýdaratyndyǵynyń taǵy bir aıǵaǵy boldy»,- dep atap ótti mektep dırektory.
