Elbasy qoryna jas ǵalymdar shoǵyrlanyp jatyr - Mahmýt Tomanov
ALMATY. QazAqparat - QR Tuńǵysh Prezıdenti - Elbasy qoryna jas ıntellektýal ǵalymdar shoǵyrlanyp jatyr. Bul týraly atalǵan qor janyndaǵy Jas ǵalymdar keńesiniń tóraǵasy, ekonomıka ǵylymdarynyń kandıdaty Mahmýt Tomanov aıtty, dep habarlaıdy QazAqparat tilshisi.
Búgin QR Tuńǵysh Prezıdenti - Elbasy qory ǵımaratynda eki kúndik «Innovatsııalyq damý jáne qazirgi Qazaqstandaǵy ǵylymǵa degen suranys» taqyrybymen HІ halyqaralyq konferentsııa bastaldy. Jıynǵa Reseı, Qyrǵyzstan, Italııa, Avstrııa, Qytaı syndy elderden jáne Qazaqstan óńirlerindegi joǵarǵy oqý oryndarynan 200-ge jýyq jas ǵalym keldi. Jıynda basty baıandama jasaǵan qor janyndaǵy jas ǵalymdar keńesiniń tóraǵasy Mahmýt Tomanov basqosýdyń negizgi mindetterine toqtaldy.
«Konferentsııa maqsaty - jas talanttardy tabý. Olardyń ǵylymı izdenisteri sórelerde qalyp qoımaı, júzege assyn dep oılaımyz. Ǵalymdardyń jumysy boıynsha jınaq jaryqqa shyǵady. Bizdiń konferentsııamyz Eýrazııa aýmaǵyndaǵy jas ǵalymdar arasynda tanymal. Jas ǵalymdar arasynda túrli halyqaralyq ǵylymı konferentsııalarǵa, start-aptarǵa qatysyp, bıikterden kórinip júrgenderi bar. Mysaly, bizdiń ıntellektýal jastarymyz qazirgi tańda «Gýgl», «Býkıng» syndy iri halyqaralyq kompanııalarda óz bilimin dáleldedi. Qazirgi ýaqytta Tuńǵysh Prezıdent qory janynda ıntellektýal jastardyń qaýymdastyǵy shoǵyrlanyp keledi desek bolady. Elbasy bir sózinde memleketimizdiń damyǵan 30 eldiń qataryna enýi úshin ıntellektýal jastardyń kómegi qajettigin aıtqan bolatyn», - dedi M.Tomanov.
Jıynda 6 sektsııa jumys isteıtin bolady. Onda tarıh, arheologııa, latyn álipbıi syndy taqyryptar boıynsha sheberlik sabaqtary oqytylady. Uıymdastyrýshylardyń aıtýynsha, jıyn «Rýhanı jańǵyrý» baǵdarlamasy aıasynda ótip otyr.
Eki kúndik konferentsııa aıasynda N.Nazarbaevtyń «Bolashaqqa baǵdar: Rýhanı jańǵyrý» maqalasyn talqylaýǵa arnalǵan «Rýhanı jańǵyrý jáne ulttyq tarıhtyń ózekti máseleleri» atty dóńgelek ústel ótedi.
Konferentsııa barysynda ǵylymı ınnovatsııalyq jobalar kórmesi men mektep oqýshylary arasynda robototehnıkadan jarys ótti. Mahmýt Tomanov jas ǵalymdardyń eńbegi bıznes qaýymdastyqtyń nazarynda ekenin aıtty.
«Biz «Atameken» kásipkerler palatasymen tyǵyz yntymaqtastyq ornatqanbyz. Ónertapqysh stýdentter arasynda baıqaýlar uıymdastyrǵanda qazylar alqasynyń quramyna bıznes qaýymdastyq ókilin kirgizýge tyrysamyz. Sebebi, kásipkerlerdiń ózi jas ǵalymdardyń ınnovatsııalyq jobalaryn baǵalap, onyń bolashaǵyna jol asha alady. Mysaly bizdiń jas ǵalymymyz adamnyń túrin tanıtyn júıe oılap tapty. Ol batys elderi óndirgen balamasynan 3 ese arzanǵa tústi»,- dedi Mahmýt Tomanov.
Konferentsııanyń ekinshi kúni, 24 qarashada Qazaqstannyń áleýmettanýshylaryna arnalǵan sheberlik sabaqtary ótedi.
