Elbasy qory «Asyl mura» fotobaıqaýyn jarııalaıdy
ASTANA. QazAqparat - Baıqaýǵa jasy 18-ben 35-ke deıingi elimizdiń kásipqoı jáne áýesqoı fotograftary qatysa alady, dep habarlaıdy QazAqparat tilshisi.
Qazaqstan Respýblıkasy Tuńǵysh Prezıdenti - Elbasynyń qorynyń atalǵan shyǵarmashylyq baıqaýdy uıymdastyrýdaǵy maqsaty - patrıotızmdi nyǵaıtýǵa, Qazaqstannyń jańa kórkem beıneleri men onyń tulǵalaryn jáne elordanyń kórikti jerlerin qalyptastyrýǵa yqpal etý.
Fotobaıqaý «Sáýlet», «Tulǵalar», «Kúndelikti ómirdegi oqıǵalar», «Qazaqstan halqynyń mádenıeti men dástúrleri» jáne «Astana» nomınatsııalary boıynsha ótkiziledi.
«Biz jyl saıyn ondaǵan taqyryptyq baıqaý, shyǵarmashylyq festıvaldar men jastarǵa arnalǵan bilim berý granttaryn uıymdastyramyz. «Asyl mura» fotobaıqaýy bizdiń elimizdiń mádenıeti men dástúrin, sáýlet óneri men otandastarymyzdyń kúndelikti tirshiligin baıandaıtyn kórkemdik shyǵarmashylyq jańa joba. Baıqaý nátıjesinde úzdik dep tanylǵan jumystar elimiz ben shetelde ótetin túrli sharalarda kórsetiletin bolady», - dedi Qazaqstan Respýblıkasy Tuńǵysh Prezıdenti - Elbasynyń qorynyń jobalaý keńsesiniń jetekshisi Záýre Túrikmenbaeva.
Konkýrs jumystaryn berý merzimi 2018 jyldyń 30 qyrkúıegine deıin jalǵaspaq.
Sondaı-aq, fotojumystardyń taqyryby konkýrsta belgilengen taqyrypqa tolyqtaı sáıkes kelýi tıis. Baıqaýdyń sharty boıynsha bir qatysýshy úsh jumystan artyq jibermeýi tıis, biraq, avtor eki nomınatsııa boıynsha qatysýǵa quqyly.
«Asyl mura» baıqaýynyń jeńimpazdaryna ár nomınatsııa boıynsha 350 myń teńge kóleminde qarjylaı syıaqy beriledi. Baıqaý nátıjesin qorytyndylaý 2018 jylǵy qazan aıynda ótpek.
«Asyl mura» fotobaıqaýyna qatysý úshin tapsyrysty Astana qalasyndaǵy Qazaqstan Respýblıkasy Tuńǵysh Prezıdenti - Elbasynyń qory mekenjaıy boıynsha joldaý qajet, sondaı-aq konkurs_fond@fpp.kz elektrondyq poshtaǵa da jiberýge bolady.
