Elbasy kitapxanasy men Geıdar Alıev ortalyǵy yntymaqtastyq týraly memorandýmǵa qol qoıdy
Qujatqa Qazaqstan Respýblıkasynyń Tuńǵysh Prezıdenti - Elbasy kitaphanasynyń dırektory Ámirhan Rahymjanov pen Geıdar Alıev ortalyǵynyń dırektory Anar Alakbarov qol qoıdy.
Memorandýmnyń maqsaty - Qazaqstan Respýblıkasynyń Tuńǵysh Prezıdenti - Elbasy N.Á.Nazarbaev pen Ázerbaıjannyń memlekettik, saıası qaıratkeri, Ázerbaıjan Prezıdenti (1993-2003 j.j.) Geıdar Alıevtiń ıdeıalary men bastamalaryn ilgeriletý, sondaı-aq, jastar saıasaty salasyndaǵy, elderdiń qalyptasýy men damý tarıhyn jáne ekijaqty qatynastardy zerdeleý boıynsha birlesken mádenı-bilim berý jáne ǵylymı-zertteý jobalaryn júzege asyrýdaǵy yntymaqtastyq.
«Eki ortalyqtyń qarym-qatynasy búgin bastalyp otyrǵan joq. Ótken jyldyń maýsymynda Geıdar Alıev ortalyǵynda Elbasy Keńsesiniń Basshysy, Tuńǵysh Prezıdenttiń seriktesi Mahmud Qasymbekovtiń ázerbaıjan tilinde jaryq kórgen «Nursultan Nazarbaev. Ómirbaıan» atty kitabynyń tusaýkeseri ótti. Mine, búgin bizdiń bolashaqtaǵy yntymaqtastyǵymyzdyń baǵyttaryn naqty anyqtaıtyn Memorandýmǵa qol qoıdyq. Eń aldymen, bul eńbegi men ómirin Qazaqstan men Ázerbaıjan syndy baýyrlas halyqtardyń damýy men gúldenýine arnaǵan ulttyq lıderlerdiń jasampazdyq ıdeıalaryn ilgeriletý. Bul zamanaýı jastar úshin úlgi, urpaqtarymyz úshin mura. Nursultan Nazarbaev pen Geıdar Alıevtiń dostyǵy Qazaqstan men Ázerbaıjan qatynastaryn nyǵaıtýda ǵana emes, sondaı-aq Táýelsiz Memleketter Dostastyǵynyń qalyptasýynda da úlken ról atqardy», - dep atap ótti Ámirhan Rahymjanov.
Geıdar Alıev ortalyǵynyń dırektory Anar Alakbarov ta óz sózinde tyǵyz qarym-qatynastyń mańyzdylyǵyn atap ótti.
«Geıdar Alıev ortalyǵy Qazaqstandy Ázerbaıjan jurtshylyǵyna keńinen tanystyrýǵa yqpal etedi. Bizdiń uıymdarymyz Qazaqstannyń Tuńǵysh Prezıdenti N.Nazarbaev pen Ázerbaıjannyń jalpyulttyq kóshbasshysy Geıdar Alıevtiń ıdeıalaryn ilgeriletý isinde belsendilik tanytýlary tıis. Búgin qol qoıylǵan Memorandým qyzmetkerlerimizge tyǵyz baılanys qurýǵa septigin tıgizedi. Atalǵan qujat aıasynda kóptegen jobalardy júzege asyryp, jaqsy nátıjelerge jetýge bolatynyna senimdimin», - dedi A.Alakbarov.
Avtory: Bekbaý Taımanov
