Elbasy kitaphanasynyń ekskýrsııalyq qyzmeti tyń jobalardy iske qosty
NUR-SULTAN. QazAqparat – QR Tuńǵysh Prezıdenti – Elbasy kitaphanasynyń ujymy týrıstik saladaǵy «Astana Konvenshn Bıýro» ókilderimen kezdesti, dep habarlaıdy QazAqparat tilshisi.
Kezdesýge ishki týrızmmen aınalysatyn kompanııalardyń ekskýrsııalyq jetekshileri, gıd-aýdarmashylar, qala mektepteri men kolledjderiniń synyptan tys jumysty uıymdastyrýshylary qatysty. Basqosý kezinde Elbasy kitaphanasynyń jańa ekskýrsııalyq baǵdarlamalary, tartymdy kvestter, «Ujymymyzben birge mýzeıge» jobalary tanystyryldy.
«Qazaqstan Respýblıkasy Tuńǵysh Prezıdenti – Elbasy kitaphanasynyń alańynda ózderińizben osyndaı erkin formatta kezdeskenime qýanyshtymyn. Dástúrge aınalǵan bul kezdesýge bıyl biz Nur-Sultan qalasynyń mektepteri men kolledjder dırektorlarynyń tárbıe jónindegi orynbasarlaryn da shaqyryp otyrmyz. Sebebi, bizdiń eń kóp kelýshilerimiz – jastar aýdıtorııasy, sonyń ishinde oqýshylar men stýdentter. Sondaı-aq, shetelden keletin týrıstter legi de jyl saıyn artyp keledi», - dedi QR Tuńǵysh Prezıdenti – Elbasynyń kitaphanasynyń dırektory Ámirhan Rahymjanov.
Kitaphana dırektorynyń aıtýynsha, jalpy Elbasy kitaphanasy elimizdiń Tuńǵysh Prezıdenti N.Á. Nazarbaevtyń ıdeıalary men bastamalaryn Qazaqstan aýmaǵynda ǵana emes, shet elderde ilgeriletetin, nasıhattaıtyn iri aqparattyq-ıdeologııalyq keshen. Osyndaı kúrdeli mazmundy ári erekshe tártiptegi nysan ekenine qaramastan, kitaphana jáne onyń mýzeıine kelem deýshilerge esik ashyq.
«Kitaphana uıymdastyryp júzege asyratyn barlyq is-sharalar da qatysam deýshilerge qoljetimdi. Ekskýrsııalyq qyzmetten basqa kitaphanada ǵylymı-tájirbıelik konferentsııalar, semınar-trenıngter, lektsııalar, saıystar, kınokórsetilimder ótkiziledi. Al ekskýrsııalyq qyzmet kórsetý jumysy odan ári jandanyp, jańa ekskýrsııalyq baǵdarlamalaryn iske qosýda. Sebebi elimizde ishki jáne syrtqy týrızmdi damytýǵa tyń serpin berip otyrǵan memlekettik baǵdarlamalar bastaý alyp keledi. Soǵan oraı, suranysqa usynys degendeı, árqashan ózimizdiń turaqty da tańdaýly ekspozıtsııalarymyz, merzimi boıynsha ýaqytsha delingenmen, mazmuny jaǵynan asa mańyzdy jáne tartymdy kórmelerimiz árdaıym qala turǵyndary men qonaqtaryn qýantyp keledi», - dedi Ámirhan Rahymjanov.
Elbasy kitaphanasy osylaısha jıynǵa kelgen pedagogtarǵa mańyzdy málimettermen bólisti. Qazaqstannyń óńir-óńirindegi kez kelgen týrıst, qala turǵyndary men meımandary Elbasy kitaphanasynan Tuńǵysh Prezıdent Nursultan Nazarbaev qol qoıǵan tarıhı qujattarmen, qundy jazbalarymen, qoldanǵan zattarymen tanysa alady.
