Elbasy kitaphanasynda ázerbaıjan tilindegi «Nursultan Nazarbaev. Ómirbaıan» kitabynyń tusaýkeseri ótti
Atalǵan sharaǵa Qazaqstan Respýblıkasynyń Prezıdenti Keńsesiniń bastyǵy - Mahmut Qasymbekov, Ázerbaıjan Respýblıkasy Prezıdentiniń qoǵamdyq-saıası suraqtar jónindegi kómekshisi - Álı Gasanov, Halyqaralyq túrki akademııasynyń prezıdenti, "Egemen Qazaqstan" respýblıkalyq gazeti» aktsıonerlik qoǵamynyń Basqarma tóraǵasy - Darhan Qydyráli qatysty.
"Nursultan Nazarbaev. Ómirbaıan" atty kitap álemdik deńgeıdegi memleket qaıratkeriniń saıası tulǵasymen birge soǵystan keıingi aýyldyń qıyndyǵynda ysylǵan, týǵan elimen astasyp ketken azamattyń ári tanys, ári ystyq beınesi sýretteledi. Eshbir oqyrmandy beı-jaı qaldyrmaıtyn aqıqat derekter kúreske toly qaısar ómirdiń tarıhqa aınala bastaǵan tolǵaqty sátteri baıandalady.
Keń aýqymdy oqyrmandar qaýymyna arnalǵan kitap Astana qalasynda 2012 jyly qazaq jáne orys tilderinde basylyp shyqqan bolatyn. Búginge deıin atalmysh týyndy aǵylshyn, nemis, káris, arab, venger, serb jáne qytaı tilderine aýdarylyp úlgerdi. Qazaqstandaǵy latyn qarpine kóshý mańyzdy máselesi qaralyp jatqanda osy kitaptyń latynǵa aýdarylyp shyǵýy el jetistiginiń taǵy bir nyshany boldy.
«Nursultan Nazarbaev. Ómirbaıan» kitabynyń ázerbaıjan tilindegi aýdarmasynyń uıymdastyrýshylardyń qatarynda Ázerbaıjan Respýblıkasy Prezıdentiniń qoǵamdyq-saıası suraqtar jónindegi kómekshisi, tarıh ǵylymdarynyń doktory, professor Álı Gasanov, Ázerbaıjan Respýblıkasy Mıllı Medjlısiniń depýtaty, fılosofııa ǵylymdarynyń doktory Djavanshır Feızıev, tanymal ázerbaıjan jýrnalısi, «Dıskaverı Azerbaıdjan» jýrnalynyń redaktory, aýdarmashy Aıda Eıvazova, Halyqaralyq túrki akademııasynyń prezıdenti, professor Darhan Qydyráli bar.
Jobanyń jetekshisi jáne kitap avtory Qazaqstan Respýblıkasy Prezıdenti Keńsesiniń bastyǵy, Qazaqstan Respýblıkasynyń Tuńǵysh Prezıdenti - Elbasy kitaphanasy dırektorynyń mindetin atqarýshy, saıası ǵylymdarynyń doktory, professor Mahmut Qasymbekov kóp jyldar boıy Memleket basshysynyń qol astynda qyzmet etip, prezıdenttik ınstıtýtty kásibı zertteýmen aınalysty.
Іs-sharany ashqan alǵy sózinde Mahmut Qasymbekov, ázerbaıjan tilinde shyqqan kitap Qazaqstan halqy men onyń Memleket basshysyna degen qurmet" ekendigin atap ótti.
Óz ómirin halqyna qaltqysyz qyzmet etýge arnaǵan túrki áleminiń belgili ári bedeldi aqsaqaly, Uly dala eliniń Tuńǵysh Prezıdenti jaıly baıandaıtyn mazmundy kitaptyń kirispesine alǵy sózdi Ázerbaıjan Respýblıkasy Prezıdentiniń qoǵamdyq-saıası suraqtar jónindegi kómekshisi, tarıh ǵylymdarynyń doktory, professor Álı Gasanov jazǵany belgili.
Á. Gasanovtyń sózine súıensek, Nursultan Nazarbaevtyń kemel saıasatynyń arqasynda búgingi kúni Qazaqstanda turaqtylyq tý tigip, erteden turaqtap qalǵan ulttar men halyqtar arasynda myzǵymas tatýlyq ornaǵan. Mýltımádenıetti qundylyqtary qalyptasqan qoǵam sonyń dáleli bolmaq. Bul elde jalpyulttyq nıeti bir 130-ǵa jýyq ult ókilderi, onyń ishinde ázerbaıjan ulty da tatý-tátti ómir súrýde.
Tusaýkeserge Qazaqstan Respýblıkasynda sheteldik dıplomatııalyq mindetterin atqaryp júrgen ókilder, Bashqurtstan, Ázerbaıjan, Qazaqstan, Qyrǵyzstan, Tatarstan, Túrkııa ǵylym akademııasynyń basshylary, otandyq jáne sheteldik ǵalymdar men qoǵam qaıratkerleri qatysty.
