Elbasy kitaphanasy jádigerlerin qashyqtan tamashalaýǵa bolady
NUR-SULTAN. QazAqparat - Elbasy kitaphanasynyń biregeı jádigerlerimen tanystyratyn ekskýrsııany endi qashyqtan tamashalaýǵa bolady, dep habarlaıdy QazAqparat.
«Elbasy kitaphanasy karantın tártibine sáıkes kelýshilerin qabyldaı almasa da, jumystyń jańa úlgisi men jurtshylyqpen baılanystyń tyń túrlerin engizýde. Osy tusta presidentlibrary.kz saıtynda vırtýaldy kórmeler, onlaın-baıqaýlar jarııalandy. Aldaǵy ýaqytta ǵylymı onlaın-konferentsııalar men beınekórmeler ótkizý josparlanǵan», - delingen habarlamada.
Nazarbaev ortalyǵy men QR Tuńǵysh Prezıdenti mýzeıi ǵımaratynyń ekspozıtsııa zaldaryna sholý jasaıtyn beınetýrlar – Elbasy kitaphanasynyń arnaıy jobasy. Kórermender Kitaphana ǵımaraty sáýletimen, zaldarmen, biregeı mýzeı, kitaphana jáne arhıvtik jınaqtarmen qashyqtan tanysýǵa múmkindik alady. Barlyq ekskýrsııalar Elbasy kitaphanasy saıtyndaǵy «Beınegalereıa» bóliminde qazaq, orys, aǵylshyn tilderinde jarııalanǵan.
Beınetýrdy júrgizgen Elbasy kitaphanasynyń ekýskýrsııa qyzmetkerleri ǵımarattyń tarıhyna toqtalyp, onyń tórinen oryn alǵan ekspozıtsııalar men kórmelerge qatysty derekterdi keltiredi.
QR Tuńǵysh Prezıdenti – Elbasy kitaphanasynyń ǵımaraty álemde tanymal brıtan sáýletshisi Norman Fosterdiń jobasymen salynǵan. Syrt kelbeti aspanǵa zer salǵan kózdiń qarashyǵyn beıneleıtin ǵımarat zaamanaýı Qazaqstannyń ómirsheń qýatyn bildiredi. Ǵımarattyń ekinshi, úshinshi qabatynda Elbasy kitaphanasynyń mýzeı, arhıv jınaqtarynan jasaqtalǵan ekspozıtsııalar ornalasqan. Elbasy jeke arhıviniń qujattary men fotomaterıaldary táýelsiz Qazaqstannyń qalyptasý úderisin, prezıdenttik ınstıtýttyń qurylýyn, jańa memleket pen onyń astanasynyń memlekettik qurylysyn beıneleıdi.
Beıneekskýrsııa kórermenderdi Tuńǵysh Prezıdenttiń alǵashqy rezıdentsııasy, keıin Elbasy kitaphanasynyń mýzeıine aınalǵan tarıhı keshenmen tanystyrady. Nursultan Nazarbaev 1997-2004 jyldary osy ǵımaratta jumys istegen. Elbasynyń jumys kabıneti bastapqy keıpinde saqtalǵan. Basqa zaldarda Qazaqstannyń jańa tarıhynyń negizgi kezeńderin beıneleıtin ekspozıtsııalar usynylǵan. Elbasy mýzeıiniń jınaǵy 11 myńnan astam saqtaý birligin quraıdy.
Beıneekskýrsııada Qazaqstandaǵy prezıdenttik ınstıtýttyń qalyptasý tarıhynyń negizgi oqıǵalarynan syr shertetin foto, beıne qujattar men mýzeı jádigerleri usynylǵan.
«Qazaqstan Respýblıkasynyń Tuńǵysh Prezıdenti – Elbasynyń qarý-jaraq toptamasy» Tuńǵysh Prezıdent rezıdentsııasy kezinde Qazaqstan Respýblıkasy Qaýipsizdik keńesiniń zaly bolǵan bólmede ornalasqan. Munda saqtalǵan árbir jádiger – shetel memleket jáne úkimet basshylarynyń, qoǵamdastyq ókilderiniń Elbasyǵa tabys etken tartýy. Qarý-jaraq toptamasynda álemniń kóptegen elderiniń zamanaýı eń úzdik qarý-jaraq óneri sheberleriniń baǵa jetpes týyndylarynan quralǵan.
Halyqaralyq mýzeı kúnine oraı Elbasy kitaphanasynyń resmı saıtynda «Beıne men pishin úndestigi» kórmesiniń beınetýry usynylǵan. Atalǵan toptamaǵa Qazaqstan halqyna, Elbasyna ózara syılastyq pen dostyqtyń nyshany retinde álemniń túrli elderiniń lıderleri, halyqaralyq uıymdar men kompanııalar jetekshileri tartý etken dıplomatııalyq syılyqtar jınaǵy endi. Ekspozıtsııada farfor, shyny, keramıka, metall, tas, aǵash sııaqty materıaldardan jasalǵan jádigerler men álemge belgili manýfaktýralar men fabrıkalardyń ónimderi usynylǵan.
Elbasy kitaphanasynyń jańa beınetýrlary týraly aqparatty onyń Facebook jáne Instagram áleýmettik jelilerindegi resmı paraqshalarynan alýǵa bolady.
