Elbasy kitaphanasy bir jyldyǵyn atap ótti
ASTANA. QazAqparat - 2014 jyldyń 13 qańtarynda Memleket basshysy «Qazaqstan Respýblıkasynyń Tuńǵysh Prezıdenti - Elbasynyń kitaphanasy» memlekettik mekemesiniń keıbir máseleleri týraly» Jarlyqqa qol qoıdy.
Búgin aıtýly mekemege bir jyl toldy. Osy oqıǵaǵa oraı Qazaqstan Respýblıkasy Prezıdenti Keńsesiniń bastyǵy, «Qazaqstan Respýblıkasynyń Tuńǵysh Prezıdenti - Elbasy kitaphanasy» MM dırektorynyń mindetin atqarýshy Mahmud Qasymbekov saltanatty jıyn ótkizdi.
Іs-sharanyń ashylýynda sóz sóılegen Kitaphana dırektorynyń mindetin atqarýshy M.Qasymbekov prezıdenttik kitaphananyń jumys isteı bastaǵany Qazaqstannyń qoǵamdyq ómiri úshin mańyzdy oqıǵa ekenine toqtaldy. «Paıda bolǵan bul jańa dástúr respýblıkamyzda aldyńǵy qatarly halyqaralyq tájirıbe arnasyndaǵy prezıdenttik ınstıtýtty nyǵaıtýǵa, sondaı-aq uzaqmerzimdik perspektıvadaǵy memlekettiń damýyndaǵy tarıhı murany jáne saıası birizdilikti saqtaýǵa baǵyttalǵan», - dedi ol.
Kitaphananyń júregi - jınaqtalǵan qory. Búginde munda 40 myńnan asa kitap pen jýrnaldar, Memleket basshysynyń jeke muraǵatynan 101 myńnan astam vıdeo, aýdıo, fotoqujattar jáne basqa da dástúrli qujattar, sondaı-aq Nursultan Nazarbaevtyń ómiri men saıası qyzmetine qatysty 700-ge tarta túrli jádiger saqtaýly.
Kitaphanada qazirdiń ózinde elimiz aımaqtarynan kelgen qonaqtar men sheteldik delegatsııalarǵa, olardyń arasynda memleket basshylaryna da tanystyrý ekskýrsııalary ótkizildi.
«Elbasy kitaphanasynyń mindeti kitaphanalyq-muraǵattyq nemese ekspozıtsııalyq-kórme qyzmetimen shektelmeıdi», - dep atap ótti M.Qasymbekov.
Mekeme jumysynyń ózekti baǵyttary - Prezıdenttiń jumys kestesin ǵylymı-taldamaly turǵydan súıemeldep otyrý, sondaı-aq Memleket basshysynyń strategııalyq bastamalaryn qoldaý maqsatynda ıdeologııalyq jáne qoǵamdyq is-sharalar atqarý.
Osy turǵyda byltyr ótkizilgen is-sharalar ishinde mynalardy atap kórsetýge bolady: 5 myńnan astam ustazdy qamtyǵan «Álemdi ózgertetin ıdeıalar» respýblıkalyq «dóńgelek ústelderi», «Tuńǵysh-Pervyı» kıno aptalyǵy, N.Nazarbaevtyń qazaq tilinde sóılegen sózderiniń tańdamaly kóp tomdyǵynyń, «Bizdiń Prezıdent» kitaptarynyń tanystyrylymy jáne basqa da qoǵamdyq mańyzdy jobalar.
Búginde elimizdiń Tuńǵysh Prezıdenti týraly kitaptar kitaphananyń jelisimen daıyndalyp, aǵylshyn, nemis, majar, qytaı, arab, túrik tilderinde shyǵaryldy. Olardyń Berlınde, Býdapeshte, Beıjińde, Dýbaıda, Ystambulda ótkizilgen tanystyrylymy atalǵan elder jurtshylyǵynyń úlken qyzyǵýshylyǵyn týǵyzdy.
Halyqaralyq yntymaqtastyqty damytý baǵyty boıynsha qyrýar ister atqaryldy. Máselen, Qazaqstan Respýblıkasynyń Tuńǵysh Prezıdenti - Elbasy kitaphanasy men Germanııanyń demokratııalyq jolmen saılanǵan alǵashqy reıhs-prezıdenti Frıdrıh Ebert atyndaǵy qor arasynda yntymaqtastyq jóninde ýaǵdalastyqqa qol qoıyldy. Osy tektes ýaǵdalastyq Qytaıdyń qazirgi zamanǵy halyqaralyq qatynastar akademııasymen jasaldy. Ótken jyly kitaphana AQSh, QHR, Japonııa, Úndistan, Eýroodaq elderi, Orta Azııa jáne Kavkazdyń barlyǵy 32 belgili ǵylymı ortalyqtarymen syndarly qarym-qatynas ornatty.
Shara sońynda Qazaqstan Respýblıkasy Prezıdenti Ákimshiligi atynan jańa uıymnyń qalyptasýy men damýy jolynda zor úles qosyp júrgen qyzmetkerlerge alǵys hattar tabys etildi, dep habarlaıdy «Qazaqstan Respýblıkasynyń Tuńǵysh Prezıdenti - Elbasynyń kitaphanasy» MM jurtshylyqpen baılanys qyzmeti.
