Elbasy ken oryndaryn barlaýǵa qatysty jumysty jandandyrýdy tapsyrdy
Sóz arasynda Memleket basshysy ken oryndaryn barlaý týraly sońǵy ýaqytta jıi aıtyla bastaǵanyn, bundaı barlaý jumystarynyń elimiz úshin mańyzdy ekenin atap ótti. «Biz - óndirýshi memleketpiz. Bizde basqa memleketter sekildi barlanǵan qorlardyń jetkilikti ósimi joq. Áli kúnge deıin jer paıdalaný quqyǵyn usynýǵa qatysty birde-bir konkýrs ótken joq, halyqaralyq ınvestıtsııany tartýǵa birde-bir kelisim jasalǵan joq. Jaqsy ınvestorlar bar, olar kedergi kóp ekenin aıtyp jatyr. Sondyqtan da nátıje joq», - dedi N. Nazarbaev.
Sonymen qatar, Memleket basshysy barlyq baǵdarlamalardy qaıta qarap shyǵyp, qarajattyń basym bóligin eń mańyzdy ári basymdyqqa ıe baǵytqa salý qajettigin aıtty.
«Balqashta JES salýǵa qatysty kelisimdi Ońtústik Koreıanyń burynǵy prezıdentimen kezdesýimnen keıin, birneshe jyl boıy júrgizip kelemiz. Áli kúnge biz stansanyń táýligine 300 vagon kómirdi qalaı tutynatynyn bile almaı dalmyz. Onda myńdaǵan adam qalaı jumys isteıdi? Qansha qarajat qarastyryldy?» - dedi N. Nazarbaev. Óz kezeginde «Samuryq-Qazyna» qorynyń basshysy Ómirzaq Shókeev atalǵan máselede paıdalanylatyn otyn túri boıynsha kelissózder júrip jatqanyn aıtqan bolatyn.
«Buny sózbuıdaǵa salýdyń qajeti shamaly, iske kirisý kerek. Parlament keshe ǵana osyny qarastyrdy. Degenmen, onda da sóz kóp. Ondaıdy doǵarý kerek. Balqash JES-i bizge soltústik pen ońtústikti rettegish retinde de asa qajet», - dedi N. Nazarbaev.