Elbasy: Qazaqtyń naǵyz tarıhyn jazyp shyǵý zııaly qaýym, ǵalymdardyń quzyrynda bolýy kerek

ASTANA. QazAqparat - Qazaqtyń naǵyz tarıhyn jazyp shyǵý zııaly qaýym, ǵalymdardyń quzyrynda bolýy kerek. Bul týraly búgin otandyq telearnalarǵa suhbat bergen QR Prezıdenti Nursultan Nazarbaev málim etti.

Memleket basshysy óz sózinde Qazaq handyǵynyń 550 jyldyǵyna oraı memlekettiń qoldaýymen Qazaqstan boıynsha 700 is-shara ótkizilgenin atap ótti. «Osynda da úlken jıyn ótkizip, men baıandama jasadym. Tarazda boldyq. Barlyq oblystarda boldy. Eldiń, jastardyń sanasyna bizdiń osyndaı tarıhymyz bar ekendigin sińirdik. Al endi ary qaraı zııaly qaýym jalǵastyrýy qajet. Tarıh jyly dep kóp nárseni jınadyq qoı, dúnıejúziniń bárinen, sol jerden baryp taptyq osynyń bárin. Bizdiń bir kemshiligimiz barlyq tarıhymyz tańbadaı basylyp, qaǵazǵa túsirilmegen. Aýyz eki áńgimemen kele jatyrmyz. Sonyń barlyǵyn óńdep, qazaqtyń naǵyz tarıhyn jazyp shyǵý zııaly qaýym, ǵalymdardyń quzyrynda bolýy kerek dep sanaımyn», - dedi QR Prezıdenti.