Elbasy Qazaqstannyń Túrki keńesindegi tóraǵalyǵyn qorytyndylady
«Qazaqstannyń tóraǵalyǵy kezinde túrki memleketteriniń ıntegratsııasy óz jalǵasyn tapty. Atap aıqanda, Astanada ótken sammıtte túrki tildes elderi ıntegratsııasynyń tujyrymdamasyn ázirleý tapsyrylǵan bolatyn. Ol qujat daıyn boldy. Onda ıntegratsııanyń maqsattary men qaǵıdattary, damý kezeńderi men iske asyrý joldary aıqyndaldy. Sondaı-aq, básekege qabiletti ulttyq ekonomıkany qurýǵa, mádenı-gýmanıtarlyq baılanystarymyzdy tereńdetýge yqylas tanyttyq. Bilim, aqparattyq tehnologııalar, energetıka, kólik-tranzıt, qarjy salalarynda yntymaqtastyqty keńeıtýge erekshe nazar aýdaryldy», - dedi N.Nazarbaev.
Prezıdenttiń aıtýynsha, Qazaqstannyń tóraǵalyǵy kezinde ǵylymı-aǵartýshylyq jumystarǵa da erekshe kóńil bólindi. Máselen, ortaq túrki tarıhyna arnalǵan oqýlyq ázirlendi.
«Atalǵan oqýlyqtyń elderimizdiń mektep baǵdarlamasyna engizile bastaǵany qýanyshty jaıt dep sanaý qajet. Bul jastardy ortaq tarıhı-mádenı muralardyń negizinde tárbıeleýdiń tıimdi tetigi bolady dep senemin. Sonymen qatar, Túrki akademııasy tarıhymyzdy tanytyp, sanany jańǵyrtýǵa baǵyttalǵan 90-nan astam kitap shyǵardy. 4 myń jyldyq mádenı-muramyzdy jınaqtap, ony jarııalaýǵa arnalǵan «Atalar mırasy» portaly iske qosyldy. Týysqan elderdiń tirshilik tamyryn basyp otyratyn «Túrki barometri» áleýmettik-zertteý jobasy iske asyryla bastady», - dep atap kórsetti Memleket basshysy.
Budan bólek, týrızm salasyn jandandyrý maqsatynda «Zamanaýı Uly Jibek joly» atty joba iske qosyldy. Atalǵan joba asynda Uly Jibek jolynda ornalasqan elderdiń kıeli oryndaryn 14 kúnde aralap shyǵýǵa bolady.
«Biz bunyń barlyǵyn túrki ıntegratsııasynyń tolaıym tabystary retinde baǵalaımyz. 2015 jyly Astanada ótken V sammıtimizden beri túrki tildes halyqtarynyń saıası baılanysy nyǵaıa tústi. Máselen, osy ýaqyt ishinde Túrki keńesiniń memleket basshylary ekijaqty kezdesýler ótkizip, ózara sapar almasty. Atalǵan úrdis elder arasyndaǵy saýda-ekonomıkalyq jáne áleýmettik qatynastardyń keńeıýine múmkindik berdi. Atap aıtqanda, Túrki keńesi memleketteri arasyndaǵy saýda-aınalymy artty. Sonymen qatar, kóne túrki ıntegratsııasy úshin mańyzy zor Ortalyq Azııa memleketteri yntymaqtastyǵynyń jańa beleske kóterilgenin atap ótkim keledi. Bıyl naýryzda Ortalyq Azııa memleketteri basshylarynyń Astanada ótken kezdesýi sonyń bir dáleli. Bundaı basqosýdy biz ary qaraı júrgizýge kelistik. Endigi kezdesý kelesi jyly naýryz aıynda Tashkentte bolady», - dedi N.Nazarbaev.
Aıta keteıik, búgingi sammıtke Qazaqstan, Qyrǵyzstan, Túrkııa, Ázerbaıjan, Ózbekstan men Majarstan basshylary qatysty. Otyrys barysynda Nursultan Nazarbaev keńeske qarasty keıbir uıymdardy qysqartýdy usyndy. Keńes músheleri QR Prezıdenti Nursultan Nazarbaevtyń usynysyn maquldady. Aldaǵy ýaqytta «Rýhanı jańǵyrýdyń» jobalary túrki álemine taralady. Ózbekstan uıymnyń jumysyna qatysa beredi. Al Majarstanǵa baqylaýshy mártebesi berildi. Sondaı-aq, keńes músheleri mańyzdy qujattarǵa qol qoıdy. Onyń ishinde túrki tildes elderdiń ıntegratsııasyna arnalǵan tujyrymdama da bar. Keńestiń Bas hatshysy aýysty. Kelesi sammıt Ázerbaıjannyń Baký qalasynda ótedi.
Foto: kabar.kz
