Elbasy Qazaqstannyń bolashaǵyna qatysty oıymen bólisedi
«Joba ataýy - bul fılmge suhbat jazý barysynda Elbasy aıtqan sóz. Nursultan Nazarbaev osynaý sóz oramymen búkil ómirin, Qazaqstannyń Tuńǵysh Prezıdenti laýazymynda gúldengen memleket qurýǵa, qazaqstandyq qoǵamdy úlesimdilik pen ál-aýqatqa qol jetkizýge arnalǵan qyzmetin atap ótedi. Búginde ol óz isin jalǵastyryp, elimizdiń táýelsizdigin nyǵaıtatyn, halqymyzdyń beıbitshiligi men birligin saqtaıtyn qazaqstandyqtardyń kelesi býynyna úlken senim artady», - dedi Aıdos Úkibaı.
Onyń atap ótýinshe, derekti fılm Táýelsiz Qazaqstannyń qalyptasý tarıhyna, eldiń halyqaralyq bedeliniń nyǵaıýyna jáne jańa elorda qurylysyna qyzyǵýshylyq tanytqan barlyq kórermenge arnalady.
«Biraq, memlekettiń 30 jyldyq tarıhyn 50 mınýttyń ishinde aıtyp shyǵý múmkin emestigin túsiný qajet. Sondyqtan biz elimizdiń qalyptasýynyń negizgi aspektilerine, bul protsestegi Tuńǵysh Prezıdent tulǵasynyń róli men mańyzyn ashýǵa basymdyq berdik. Fılmdi túsirý jumystary osy jyldyń naýryzy men maýsym aılary aralyǵynda júrgizildi. Bastamamyzdy júzege asyrýǵa Nursultan Nazarbaev qory úlken qoldaý kórsetti. Joba úshin BUU-nyń burynǵy Bas hatshysy Pan Gı Mýnmen, MMÝ rektory Vıktor Sadovnıchpen, jýrnalıst Mıhaıl Gýsmanmen, ózge de tanymal saıası jáne qoǵam qaıratkerlerimen suhbat jazdyq», - dedi ol.
Tuńǵysh Prezıdent baspasóz hatshysynyń atap ótýinshe, fılm ótken oqıǵalarǵa ǵana arnalmaǵan. Jýrnalıst Aıgúl Ádilova Elbasymen suhbattasý barysynda Qazaqstannyń jáne jalpy álemniń bolashaǵyna qatysty oı-pikirine de qyzyǵýshylyq tanytqan.
«Nursultan Nazarbaevtyń osy jáne ózge de saýaldarǵa jaýabyn estý úshin derekti fılmdi «Habar« telearnasynan 6 shilde kúni saǵat 21-40-ta, «KTK« telearnasynan 7 shilde kúni saǵat 20-00-de tamashalaýǵa keńes beremiz», - dedi Aıdos Úkibaı.
