Elbasy Qazaqstannyń basty basymdylyqtaryn atady
«Qazaqstan EAEO, ShYU, TMD jáne UQShU arnalarynyndaǵy is-qımylǵa erekshe mán beretindigin bilesizder. Elimizdiń syrtqy saıasatyndaǵy óńirlik yntymaqtastyqty nyǵaıtý máseleleriniń máni zor. 2017 jyldyń qorytyndysy boıynsha, Qazaqstan jaqsy ekonomıkalyq kórsetkishterge qol jetkizdi. Ekonomıkalyq jáne ınvestıtsııalyq yqpaldastyqty nyǵaıtý, sheteldik áriptestermen yntymaqtastyq negizgi baǵyttarymyzdyń biri. Biz saýda-sattyq kólemin ulǵaıtyp, óndiristi órkendetý úshin tıimdi ınvestıtsııa ákelýge múddelimiz. 2017 jyly Qazaqstan bıznes júrgizý jeńildigi reıtıngi boıynsha 190 eldiń arasynda 36 orynǵa ıe boldy», - dedi búgin Aqordada birqatar sheteldiń Tótenshe jáne Ókiletti Elshilerinen senim gramotalaryn qabyldaǵan Nursultan Nazarbaev.
Memleket basshysy «EKSPO-2017» kórmesi barysynda jasyl tehnologııalardy damytý jónindegi halyqaralyq ortalyq pen ІT startaptardyń halyqaralyq tehnoparki qurylǵanyn da atap ótti.
«Astana halyqaralyq qarjy ortalyǵynyń qyzmetin jandandyrý Qazaqstannyń basty basymdyqtarynyń biri. Osyǵan oraı sizderde halyqaralyq qarjy ortalyǵyn damytýǵa at salysyp, onyń ıgiligin kórýge shaqyramyz. Ózara tıimdi saýda-ekonomıkalyq yntymaqtastyqty nyǵaıtý úshin Qazaqstandaǵy zor múmkindikterdi keńinen paıdalaný qajet», - dedi Elbasy.
Elbasy aǵymdaǵy jyly elimizde birqatar mańyzdy halyqaralyq is-sharalar josparlanyp otyrǵandyǵyna toqtaldy.
«Atap aıtqanda, Astana ekonomıkalyq forýmy, Álemdik jáne dástúrli dinder kóshbasshylarynyń 6-shy sezi, Dúnıejúzilik ıslam ekonomıkalyq forýmy ótedi. Osy bas qosýlarǵa sizderdiń elderińiz belsene qatysady dep oılaımyn», - dedi Memleket basshysy.
Nursultan Nazarbaev sóz sońynda Elshilerdi Qazaqstandaǵy dıplomatııalyq qyzmetteriniń bastalýymen quttyqtady. 
«Qazaqstandaǵy dıplomatııalyq qyzmetterińizdiń bastalýymen taǵy da sizderdi quttyqtaımyn. Elimizdegi atqarǵan jaýapty qyzmetterińiz tabysty, árbir kúnderińiz sátti bolsyn. Barshalaryńyzǵa zor densaýlyq, baq-bereke tileımin», - dedi Qazaqstan Prezıdenti.
