Elbasy: Qazaqstannyń básekelestikke tótep bere alatyn basty ereksheligi - ken baılyǵy
«Qazaqstannyń munaıy, gazy, tústi jáne qara metaldary, basqa da mıneraldary eń birinshi baılyǵy, ekinshi - bizdiń keń dalamyz, onda ósetin astyq pen mal. Qazir biz dúnıe júzinde un satýdan birinshi-ekinshi oryndamyz. Ýran boıynsha da birinshi-ekinshi oryndamyz. Hrom satýda eń úzdik elderdiń arasyndamyz. Bizdiń erekshelikterimiz qazirgi ýaqytta - osy», - dedi Memleket basshysy. Munymen qatar, Prezıdent elimiz bolashaqta qandaı baǵytta damý kerektigin tilge tıek etti. «Bizdiń ındýstrııalandyrý baǵdarlamasyn, óńdeý óndirisin shyǵaryp otyrǵanymyz nelikten? Bolashaqta basqa da taýarlardy syrtqa shyǵarýymyz qajet. Aýyl sharýashylyǵyna keler bolsaq, biz bıdaıdy óńdep, tek bıdaı men undy ǵana satpaı, nandy da, kespeni de, basqany da shetelderge shyǵaratyn bolsaq, al etti jaı et túrinde ǵana satpaı, neshe túrli shujyqtar men et taǵamdaryn jasap satatyn bolsaq; kıim tigetin bolsaq; óndiriste neshe túrli mashınalar jasaıtyn bolsaq, sonda ǵana paıda kóremiz. Sondyqtan, ındýstrııalyq baǵdarlamada eń aldymen munaı men gazdy óńdeý zaýyttaryn salý kerek», - dep túsindirdi N. Nazarbaev. Memleket basshysynyń aıtýynsha, búginniń ózinde elimizde qurastyrylǵan avtokólikter, teplovozdar eksporttala bastady. Sonymen qatar, Qytaı Halyq Respýblıkasymen birlesken 15-20 shaqty zaýyttar salýǵa kelissózder júrgizilip jatyr jáne olardyń barlyǵy óńdeý ónerkásibi salasynda bolmaq.