Elbasy qazaqstandyqtardy dástúrli qundylyqtardy, ózara qurmetti jáne toleranttylyqty saqtaýǵa shaqyrdy
ASTANA. Mamyrdyń 1-i. QazAqparat /Ernur Aqanbaı/ - Elbasy Nursultan Nazarbaev barsha qazaqstandyqtardy budan da etene birigip, jańa maqsattarǵa birge barýǵa, dástúrli qundylyqtardy, ózara qurmetti jáne toleranttylyqty saqtaýǵa shaqyrdy,
dep habarlaıdy QazAqparat.
«Bizder etnıkaaralyq, konfessııaaralyq beıbitshilik pen kelisimdi qamtamasyz etýde baǵaly tájirıbe jınadyq. Bul uǵym búgingi merekeniń rýhyna, bizdiń halyqtyń rýhyna sáıkes keledi», dedi Elbasy búgin Astanada jınalǵandardy Qazaqstan halqynyń birligi merekesimen quttyqtaǵan sózinde.
Memleket basshysy ultaralyq kelisim- bul kez-kelgen eldiń jáne halyqtyń júıke júıesi ekendigin atap kórsetti. «Eger júıke júıesi aqaý beretin bolsa, onda densaýlyq ta aqaý beretin bolady. Bizdiń barlyq jetistikterimiz beıbitshilik pen kelisimniń arqasynda bolyp otyr. Álemde ultaralyq jáne dinaralyq arazdyqtyń apatty saldarynyń mysaly jeterlik. Táýelsizdik jyldary ishinde biz qalyptastyrǵan mundaı kelisim men beıbitshilik memlekettik jumystyń jáne bizdiń búkil qoǵamnyń qajyrly eńbegi. Bul biz saqtaýǵa tıisti ortaq dáýletimiz», dedi Prezıdent.
Memleket basshysy bul kún shyn mánindegi halyqtar dostyǵynyń kúni ekenin atap kórsetti. «Mamyrdyń 1-i biz úshin shyn mánindegi shynaıy búkilhalyqtyq saltanatqa, barshamyz úshin qýanyshty, súıikti merekege aınaldy», dedi N. Nazarbaev.
