Elbasy: Qazaqstandyqtar amerıkalyqtardaı bırjamen jumys isteýdi úırenýi kerek

ASTANA. QazAqparat - Amerıka halqynyń 70 paıyzy aktsııa arqyly qosymsha aqsha taýyp otyr. Qazaqstandyqtar da osy kóshten qalmaýy kerek. Otandyq BAQ ókilderimen kezdesý ótkizgen Memleket basshysy Nursultan Nazarbaev osylaı dep pikir bildirdi, dep habarlaıdy «QazAqparat» HAA tilshisi.

«Munda Astana qarjy ortalyǵy (EKSPO aýmaǵynda - avt.) qurylady. Qazaqstandyqtar qazir bırjamen jumys isteýdi bilmeıdi. Aktsııamen jumys júrgizýden habarsyz. Amerıka halqynyń 70 paıyzy aktsııa arqyly qosymsha aqsha taýyp, aktsııalardyń baǵasyn baqylap otyr. Sondyqtan, biz de qazaqstandyqtardy aktsııaǵa aqsha salyp, kompanııalardyń qalaı jumys isteıtinin baqylaýdy, dıvıdendterdi alyp, osy arqyly baıýdy úıretemiz», - deıdi Qazaqstan Prezıdenti.

Memleket basshysy, sonymen birge, EKSPO aýmaǵynda jasyl tehnologııalardy taratý ortalyǵy ashylyp, kompanııalardyń óndiristik startapy jumysqa kirisetinin atap ótti. EKSPO aýmaǵynda ІT-tehnologtar eńbektenedi.

«Men bul kúnde bas sýdıany da bekitip qoıdym. Sebebi, munda aǵylshyn júıesindegi sot jumys istep, aǵylshyn sýdıalary eńbek etetin bolady. Eń bastysy - senim kerek. Kelispeýshilikter qaıda sheshilip, sheteldik kompanııalar qalaısha aqsha quıa alady? Ol úshin zańnyń quzirettiligi kerek. Demek, bunyń barlyǵy jumys atqaratyn bolady. Infraqurylym men ındýstrıalızatsııaǵa ne úshin aqsha salyp jatyrmyz? Óıtkeni, bırjalyq taýarlardyń baǵasy óte tez ósip barady. Al bul ýaqytta otyra bersek, múlde aqshasyz, zeınetaqysyz, aılyqsyz qalamyz. Barlyǵy da qolymyzdan keletin deńgeıde, baǵdarlama sheńberinde júzege asatyn bolady», - deıdi Elbasy «Astana» qarjy ortalyǵy týrasynda.

Eske sala ketsek, 22 jeltoqsan kúni Elbasy Nursultan Nazarbaev elimizdegi jetekshi BAQ ókilderine 2017 jyldy qorytyndylaýǵa arnalǵan suhbat berdi. Onda qazaq qoǵamyndaǵy eleýli ózgerister men ózekti máseleler týraly jýrnalıster suraǵyna jaýap berdi. Atalmysh suhbattyń televızııalyq nusqasy búgin respýblıkalyq telearnalardyń efırinen kórsetildi.