Elbasy qazaqstandyq jas kompozıtorǵa: Endi seni tyńdaıtyn bolamyn

ASTANA. QazAqparat - Elbasy Nursultan Nazarbaev jas kompozıtor Rahat-Bı Ábdisaǵınge Motsarttan keıin onyń mýzykasyn tyńdaýǵa ýáde berdi. Bul týraly Prezıdent «Qazaqstannyń 100 jańa esimi» jobasynyń jeńimpazdarymen kezdesý kezinde aıtty, dep habarlaıdy «QazAqparat» HAA tilshisi.

Eske salaıyq, búgin Memleket basshysy Astanada «Qazaqstannyń 100 jańa esimi» jobasyna iriktelgen 102 jeńimpazben kezdesti . Onyń barysynda qazaqstandyq jas kompozıtor Rahat-Bı Ábdisaǵın ózin tanystyrdy. Jas órenniń aıtýynsha, ol 13 jasynda - stýdent, 17 jasynda magıstrant atanǵan.

«Qurmetti Nursultan Ábishuly! Men kompozıtor ári pıanınoshymyn. Óner ǵylymdarynyń magıstrimin. 13 jasymda - stýdent, 17 jasymda magıstrant atandym. Jaqynda ǵana Rımnen keldim. Ol jaqta doktorantýraǵa tústim. Rımdegi akademııa 16-ǵasyrda ashylǵan. Fınaldyq kezeńge 14 adam kelip, 5 adam ǵana oqýǵa tústik. Eń bastysy -sol akademııaǵa túsken eń jas ári tuńǵysh qazaqstandyq boldym», - dedi Rahat-Bı Ábdisaǵın.

Jas kompozıtor 13 jasynda shyǵarǵan týyndysyn kópshilik aldynda oınap berdi. Elbasy óz kezeginde jas órenge baq tiledi.

«Men uıyqtar aldynda Motsartty tyńdaımyn. Maǵan onyń áýenderi unaıdy. Adamdy tynyshtandyrady. Meniń oıymsha, oǵan bir ǵaryshtyq rýh engen sekildi. Mundaı áýen jaıdan-jaı týa salmaıdy ǵoı... Solaı ma? Seniń áýeniń de sondaı. Endi seni tyńdaıtyn bolamyn», - dep atap ótti Nursultan Nazarbaev.