Elbasy Qazaqstandy álemniń TMD-da ıslamdyq qarjylandyrýdy damytyp otyrǵan kóshbasshy el dep baǵalaýyna óz áserin tıgizdi - Q.Kelimbetov
ASTANA. QazAqparat - Elbasy Qazaqstandy álemniń TMD aýmaǵynda ıslamdyq qarjylandyrýdyń damýyna yqpal etip otyrǵan kóshbasshy memleket retinde baǵalaýyna óz áserin tıgizdi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq bankiniń tóraǵasy Qaırat Kelimbetov málim etti.
«Dúnıejúzilik ıslam ekonomıkalyq forýmynyń jumysy aıasynda Qazaqstan Prezıdenti Nursultan Nazarbaev Slobal Global Islamic Finance Awards uıymynyń «Islamdyq qarjy boıynsha jahandyq kóshbasshy» syılyǵymen marapattaldy. Bul syılyq - álemdik qaýymdastyqta, jalpy Islam qarjylandyrý salasynda asa bedeldi syılyq. Esterińizge salsaq, álemde osy Islam qarjylandyrý boıynsha úsh syılyq qana bar. Bul syılyqty alýy arqyly Elbasy Qazaqstandy álem elderiniń TMD aýmaǵynda Islam qarjylandyrýyn alǵa tartyp, onyń damýyna yqpal etip otyrǵan kóshbasshy memleket retinde baǵalaýyna óz áserin tıgizdi», - dedi Ulttyq bank tóraǵasy.
Q.Kelimbetovtiń atap ótýinshe, Elbasynyń qoldaýynyń arqasynda Qazaqstanda Islamdyq qarjylandyrý óte belsendi damyp kele jatyr. Daǵdarys kezinde Taıaý Shyǵystan ınvestorlar tartyldy. Islamdyq qarjylandyrý boıynsha zań qabyldanyp, alǵashqy «al-Hılıal» banki ashyldy. QR Prezıdentiniń tapsyrmasyna sáıkes Islam qarjylandyrýynyń 2020 jylǵa deıingi jol kartasy daıyndalyp, qabyldandy.
«Elbasy óz Joldaýynda Almaty aımaqtyq qarjy ortalyǵyn damytý boıynsha maqsat qoıdy. 2020 jylǵa deıin Almatynyń Azııanyń eń iri on qarjy ortalyǵy qataryna enýine jaǵdaı jasaýdy tapsyrdy. Keshegi ótken forýmda Elbasy Almatynyń TMD, shyǵys Eýropadaǵy Islam aımaqtyq haby retinde qamtylatyn eldiń ıslam qarjylandyrýyna rólin arta beretinine mán berdi. Osy maqsat boıynsha Ulttyq bank biraz is-sharalar jasap otyr», - dedi ol.
