Elbasy: Qazaqstanda ınvestıtsııalyq ahýaldy jaqsartýǵa baǵyttalǵan jumystar turaqty júrgiziledi
Bıznesmendermen kezdesý barysynda Nursultan Nazarbaev elimizdi ınvestıtsııalyq ahýaldy jaqsartýǵa baǵyttalǵan jumystardyń turaqty júrgizilip, kásipkerlik salasyndaǵy zańnamalar yryqtandyrylǵanyn atap ótti.
«Dúnıejúzilik banktiń Doing Business reıtınginde Qazaqstan 190 eldiń ishinde 36 orynda tur. Qazaqstan EYDU Investıtsııalar jónindegi komıtetiniń qaýymdastyrylǵan múshesi sanalady jáne Halyqaralyq ınvestıtsııalar týraly deklaratsııaǵa qosyldy. Investorlarmen jáne bıznespen ózara tıimdi is-qımyldy jolǵa qoıý maqsatynda «Qazaq ınvest» jáne «Qazaq eksport» kompanııalary quryldy. Prezıdent janyndaǵy Shetel ınvestorlary keńesi jumys isteıdi», - dedi Elbasy.
Memleket basshysy metallýrgııa, munaı óńdeý, mashına jasaý, hımııa, azyq-túlik ónimderin óndirý syndy basymdyqqa ıe salalarda ınvestıtsııalyq jobalardy júzege asyrý barysynda korporatıvtik, jer jáne múlik salyǵy alynbaıtyndyǵyn aıtty. Sonymen qatar mundaı jobalarǵa sheteldik jumys kúshin tartý kvotasyz jáne ruqsatsyz júzege asyrylatyndyǵyn atap ótti.
«Jer qoınaýyn paıdalanýǵa arnalǵan lıtsenzııalardy alý jáne kelisimsharttar jasasý tártibi jeńildetiledi. 11 arnaıy ekonomıkalyq aımaq pen 22 ındýstrııalyq aımaq jumys isteıdi. AEA qatysýshylary salyqtyń jeńildikter men basqa da artyqshylyqtar beriledi. Fın kompanııalaryn Qazaqstanda bıznes damytýǵa shaqyramyz», - dedi Nursultan Nazarbaev. 
Esterińizge sala ketsek, búgin Qazaqstan Prezıdenti Nursultan Nazarbaev resmı saparmen Fınlıandııaǵa keldi.
Sapar aıasynda Elbasy fın bıznes kapıtandarymen kezdesti.
Al erteń Nursultan Nazarbaevtyń Fınlıandııa Respýblıkasynyń Prezıdenti Saýlı Nıınıstemen shaǵyn jáne keńeıtilgen quramdaǵy kezdesýi josparlanyp otyr.
foto: akorda.kz