Elbasy «Qazaqstan» telearnasyna qyrkúıekten bastap habar taratýdy tolyǵymen memlekettik tilge kóshirýdi tapsyrdy

«Tilderdi damytýda BAQ róliniń mańyzy óte joǵary dep bilemin. Mysaly, búginde balalarǵa arnalǵan «Balapan» telearnasy qazaq tilinde habar taratýda. Men «Qazaqstan» telearnasyna bıylǵy jyldyń qyrkúıeginen bastap habar taratýdy tolyǵymen memlekettik tilge kóshirýdi tapsyramyn», - dedi Memleket basshysy keshe «Aqordada» respýblıkalyq BAQ ókilderine bergen suhbatynda.

N. Nazarbaev suhbat berý barysynda memlekettik tildi damytýdyń mańyzdy mindet bolyp tabylatynyn aıtty. «2009 jylǵy derekter boıynsha, memlekettik tildi meńgergen qazaqstandyqtardyń sany 64,4 paıyzǵa deıin kóbeıgen. 2020 jylǵa qaraı memlekettik tilde sóıleıtin qazaqstandyqtardyń sany 95 paıyzdan kem bolmaýǵa tıis. Búginde Qazaqstanda oqytý úderisi qazaq tilinde júrgiziletin 1178 balabaqsha men ortalyqtar jumys isteıdi. Memlekettik tilde bilim beretin mektepterdiń sany 3821-ge jetken. Tilderdi damytýdyń 2011-2020 jyldarǵa arnalǵan memlekettik baǵdarlamasy qabyldandy», - dedi Prezıdent.

Prezıdent qazaqstandyqtarǵa keminde úsh tildi - memlekettik, orys jáne aǵylshyn tilderin meńgerýdiń qajet ekenin atap aıtty. «Úsh tildi bilý bizdiń bolashaǵymyz úshin qajet. Álem barǵan saıyn jahandana túsýde, keleshek urpaqqa úlken tildik ortalarǵa beıimdele bilýdiń mańyzy zor», - dedi N. Nazarbaev.