Elbasy Qazaqstan óz damýynda budan bylaı Fınlıandııanyń tájirıbesin eskerýi tıistigin aıtty
ASTANA. Qańtardyń 22-si. QazAqparat /Ernur Aqanbaı/ - Qazaqstan óz damýynda budan bylaı Fınlıandııanyń tájirıbesine arqa súıeıtin bolady,
dep habarlaıdy QazAqparat.
«Biz buryn óz damýymyzda Ońtústik-Shyǵys Azııanyń barystarynan sabaq aldyq. Men osyndaı saıasatty júrgizdim jáne durys jasadyq. Olardyń strategııany qalaı jasaǵanyn, qalaı damyǵanyn, kadrlardy qalaı daıyndaǵanyn úırendik. Biz qazir bul kezeńnen óttik, endi bizge Fınlıandııadan úırengen jón», dedi Elbasy Nursultan Nazarbaev búgin Aqordada Úkimettiń ekonomıkalyq blogymen ótkizgen keńesinde.
Osy oraıda Prezıdent Fınlıandııanyń qarqyndy damýynyń mańyzdy tustaryn atap kórsetti. «Biz Fınlıandııada bolyp, olardyń tájirıbelerimen tanystyq, qolymyzda barlyq qujattar bar. Fınlıandııadan úırený degenimiz neni bildiredi? Eń aldymen joǵary standartty bilim. Ekinshisi, ǵylymı ázirlenimderge qarajatty bólýdegi básekelestik. Úshinshisi, keleshektiń ulttyq ınfraqurylymdary. Tórtinshisi, memlekettiń, ǵylym men bıznestiń kúshin biriktirý. Eger qysqasha aıtatyn bolsaq, olardyń damýy osy tórt tujyrymnan turady», dedi Memleket basshysy.
N. Nazarbaev Úkimet 2010 jylǵy jumysynda, sondaı-aq Qazaqstannyń 2020 jylǵa deıingi damý strategııasyn túpkilikti pysyqtaǵanda osy dúnıelerdi eskerýi tıistigin aıtty.
