Elbasy Qazaqstan memleketin barsha álemge moıyndatqan tarıxı tulǵa - depýtat Jaıylǵanova
"Áriptesterimniń aıtqan usynystaryna toqtalǵym keledi. Men Táýelsizdikpen birge Tuńǵysh Prezıdent - Ult Kóshbasshysy Nursultan Nazarbaevtyń mártebesine qatysty Konstıtýtsııanyń 91-baby 2-tarmaǵyna engiziletin ózgeristerdi qoldaımyn. Sebebi Elbasy Qazaqstan memleketin xalyqaralyq qaýymdastyq aldynda shekarasyn moıyndatqan táýelsiz el retinde tanytty, osylaısha babalarymyzdyń baǵzy zamandardan kele jatqan armanyn oryndady. Elbasynyń qaıtpas qaısarlyǵynyń arqasynda bizdiń maqtanyshymyz - Astana paıda boldy. Sondyqtan men bul usynysty qoldaımyn jáne óz áriptesterimdi de buny qoldaýǵa shaqyramyn", - dedi Jaıylǵanova.
Sonymen qatar ol Konstıtýtsııada Prezıdenttiń Іshki ister mınıstrin taǵaıyndaý ókilettigin qaldyrýdy usyndy.
"Konstıtýtsııanyń qazirgi redaktsııasy boıynsha qorǵanys, ishki ister, ádilet jáne syrtqy ister mınıstrlerin Prezıdenttiń ózi taǵaıyndaıdy. Al konstıtýtsııalyq ózgeristerge sáıkes, ádilet jáne ishki ister mınıstrin alyp tastap, tek syrtqy ister men qorǵanys mınıstrlerin qaldyrý usynylyp otyr. Jaraıdy, ádilet mınıstrin taǵaıyndaýdy Memleket basshysynyń quzyretinen shyǵarýǵa bolady. Al ishki ister mınıstrliginiń qoǵamdyq tártip pen ishki qaýipsizdik sııaqty strategııalyq jumysyn eskere otyryp, ony taǵaıyndaý máselesin Prezıdentke qaldyrý qajet dep sanaımyz. Nege? Sebebi Prezıdent Konstıtýtsııa boıynsha Qazaqstan Respýblıkasy azamattary qaýipsizdiginiń kepili bolyp tabylady. Al Іshki ister mınıstri sol qaýipsizdikti qamtamasyz etedi. Sonymen qatar Prezıdent elimizdiń Qarýly Kúshteriniń Joǵarǵy Bas Qolbasshysy ekeni aıan. Al Іshki ister mınıstrligi Ulttyq ulanǵa basshylyq etetin áskerılendirilgen uıym bolyp tabylady", - dedi depýtat Anar Jaıylǵanova.
Onyń aıtýynsha, Parlamentke esep beretin Úkimet, abyroıly da jaýapty Parlament jáne zań ústemdigi men ádildikti qamtamasyz etetin Sot bıligi qajet.
"Sot tóreliginiń júzege asýy jáne azamattarymyzdyń quqyqtaryn qorǵaý ádil, zańdy, sondaı-aq sozbalańsyz bolýy qajet. Sondyqtan Ata zańymyzdyń 81-babyna osy mańyzdy jaǵdaıdy iske asyratyn ózgeris engizilýde. Oǵan sáıkes bizdiń adamdarymyz óz quqyqtaryn qorǵaýda sottyń úsh satysynan ǵana ótedi, ıaǵnı ár adamnyń quqyǵyn sot arqyly qalpyna keltirý ońtaılandyrylady.
Al Konstıtýtsııalyq Keńestiń quzyreti keńeıtilýde. Bul tolyqtyrýdyń mańyzy óte zor, óıtkeni qoldanystaǵy Konstıtýtsııa normalaryna saı, kúshine engen zań jáne ózge de quqyqtyq aktiler sot qaraýynyń sheńberine túskende ǵana, 78-baptyń tártibinde Konstıtýtsııaǵa sáıkestigi tekseriletin. Al osy túzetý qabyldanǵan jaǵdaıda, azamattarymyzdyń quqyqtary men bostandyqtaryn qorǵaý konstıtýtsııalyq jańa joǵary deńgeıge kóteriletini sózsiz.
«Reformalar baǵdarlamasy ol Qazaqstan qaı baǵytta júredi degen saýalǵa bizdiń jaýabymyz. Demokratııalyq damý jaǵyna qaraı. Jaýap aıqyn ári dáıekti», - Elbasynyń osy sózimen óz oıymdy túıindeımin. Zań jobasyn tolyǵymen qoldaımyn jáne áriptesterimdi ony biraýyzdan qoldaýǵa shaqyramyn", - dep túıdi sózin depýtat.
