Elbasy: Qazaqstan MAGATE-niń senimdi seriktesine aınaldy

ASTANA. QazAqparat - Qazaqstan beıbit atom energııasyna jaýapty MAGATE-niń senimdi seriktesine aınaldy. Bul týraly búgin Qazaqstan Respýblıkasynda Atom energııasy jónindegi halyqaralyq agenttiktiń Tómen baıytylǵan ýran banki ǵımaratyn saltanatty ashý rásiminde Elbasy Nursultan Nazarbaev málim etti, dep habarlaıdy QazAqparat.

Memleket basshysy Qazaqstan álemdegi tórtinshi arsenaldan bas tartyp, ıadrolyq qarýdy jahandyq taratpaýdyń kóshbasshy memleketine aınalyp, ekpindi qadamdardy eńsergenin qadap aıtty.

«Qazaqstan beıbit atom energııasyna jaýapty BUU-nyń jalǵyz qurylymy - MAGATE-niń senimdi seriktesine aınaldy. MAGATE-ge Tómen baıytylǵan ýran bankin ornalastyrý múmkindigin usyna otyryp, Qazaqstan ıadrolyq qarýdy taratpaý rejimin nyǵaıtýǵa kezekti úlesin qosty. Ekinshiden, ıadrolyq otyndy qaýipsiz túrde jetkizýdiń biregeı tetigi quryldy»,-dedi N. Nazarbaev.

Bul turǵyda Prezıdent atalǵan bank tolyqtaı MAGATE-niń qadaǵalaýynda qyzmet etetinin atap ótti.

«Jańa ǵana Qazaqstanda MAGATE-niń Tómen baıytylǵan ýran bankin saltanatty ashý rásimine kýáger boldyq. Biz elimiz ben barsha álemdik qoǵamdastyq úshin erekshe máni bar kúnde jınalyp otyrmyz. Osy kúni, ıaǵnı 1991 jyldyń 29 tamyzynda meniń Jarlyǵymmen álemdegi eń iri Semeı ıadrolyq synaq polıgony jabyldy. Synaq alańynda 49 jyldyń ishinde Qazaqstannyń halqy tyǵyz ornalasqan aýmaǵynda 550-den astam ıadrolyq zarıad jaryldy. Onyń saldarynan 1,5 mln adam zardap shekti, úshinshi urpaqtyń ózinde osy synaqtardyń taýqymetin sezinip otyrmyz»,-dep atap ótti Memleket basshysy.