Elbasy: Qazaqstan ekonomıkalyq táýekelderge qaramastan halyqty áleýmettik qoldaý sharalaryn jalǵastyrady
ASTANA. QazAqparat - Ekonomıkalyq táýekelderge qaramastan biz halyqty áleýmettik qoldaý sharalaryn jalǵastyramyz. Búgin Astanadaǵy Táýelsizdik Saraıynda Qazaqstan Prezıdenti Nursultan Nazarbaev «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýynda osylaı málimdedi.
«Kóptegen jyldar boıy qarqyndy dınamıkalyq ósim bizge belsendi áleýmettik saıasatty júrgizýge septigin tıgizdi. Azamattarymyzdyń ómir sapasyn birneshe esege arttyra aldyq. Ekonomıkamyz bastan keship otyrǵan qıyndyqtarǵa, jahandyq qubylystarǵa qaramastan biz halqymyzdyń ál-aýqatyn arttyryp keldik. On jylda áleýmettik salaǵa jumsalǵan shyǵystar úsh esege artty», - dedi N. Nazarbaev.
Bul rette Memleket basshysy áleýmettik saladaǵy memelkettik basqarýlarda jumys isteıtin 1,2 mln. adamnan asatynan atap ótti. Al memleket qamtamasyz etip otyrǵan áleýmettik tólemderdi alýshylar sany 1,5 mln adamnan asqan.
«Ekonomıkalyq táýekelderge qaramastan biz halyqty áleýmettik qoldaý sharalaryn jalǵastyramyz. Men 2016 jyldyń 1-shi qańtarynan bastap, densaýlyq saqtaý salasy qyzmetkerleriniń jalaqysy ortasha alǵanda 28 paıyzǵa, bilim berý -29, áleýmettik sala qyzmetkerleriniń jalaqysy ortasha alǵanda 40 paıyzǵa artatynyn jarııalaımyn. Bul rette bıýdjettik sala qyzmetkerleriniń sanaty boıynsha jalaqysyna saralanǵan tólemdi engizý aqylǵa qonymdy. Kelesi jyly áleýmettik járdemaqylardy, múgedektigi úshin beriletin járdemaqylar men shákirtaqy mólsherin 25 paıyzǵa arttyrý qamtamasyz etiledi. 2016 jyldyń 1-shi qańtarynan biz yntymaqty zeıtenaqyny ınflıatsııa deńgeıinen aldyn ala 2 paıyzǵa ındektsııalaıtyn bolamyz», - dedi N. Nazarbaev.
