Elbasy: Qazaqstan áskerı qyzmetshileriniń Beıjińdegi sherýge qatysýy -fashızmge qarsy kúrestegi ortaq jeńisimizdiń nyshany
Bul týraly aǵymdaǵy jyldyń 31 tamyzy men 3 qyrkúıegi aralyǵynda Beıjińge josparlanyp otyrǵan sapary aıasynda Qytaıdyń jetekshi «Sınhýa» aqparat agenttigine eksklıýzıvti suhbat bergen QR Prezıdenti Nursultan Nazarbaev aıtty.
Memleket basshysynyń aıtýynsha, fashızmge qarsy soǵys árbir qazaqstandyq otbasyna zor aýyrtpalyq ákeldi. Adamzat tarıhyndaǵy eń zulmat sol soǵys jyldary ishinde Qazaqstannyń árbir 5-shi turǵyny jumyldyryldy. Shamamen 1 mıllıon 200 myń adam maıdanǵa attanyp, sonyń jartysy maıdan dalasynan qaıtyp oralmady. Tylda armııanyń kerek-jaraǵy úshin áıelder, qarttar men balalar eńbek etti.
«Sondyqtan qazaqstandyqtardyń Beıjińdegi sherýge qatysýy - bul bizderdiń fashızmge qarsy kúrestegi ortaq jeńisimizdiń,
jeńiske qosqan birlesken úlesimizdiń nyshany», - dedi Elbasy.
Qazaqstan Prezıdenti búgingi kúni Qytaı Qazaqstannyń óńirlik qaýipsizdikti qamtamasyz etý, saýda-ekonomıkalyq jáne gýmanıtarlyq salalardaǵy strategııalyq seriktesi bolyp otyrǵanyn basa aıtqan.
«Bizderdiń halyqaralyq kún tártibindegi barlyq mańyzdy máseleler boıynsha múddemiz de, kózqarasymyz da uqsas. Aldaǵy ýaqytta ótetin sherýdiń bizderdiń halyqtarymyz arasyndaǵy dostyq qarym-qatynastardy odan ary nyǵaıta túsýge septigin tıgizetindigine senimim mol», - dedi N.Nazarbaev.
