Elbasy qazaq tiliniń 25 jyl ishindegi jaǵdaıyna baǵa berdi
"Biz qasıetti qazaq tili men ulttyq mádenıetimizdiń jahandyq gýmanıtarlyq keńistikke erkin enýin qamtamasyz ettik. Ózderińiz kórip, estidińizder, qazaqtyń tili Birikken Ulttar Uıymy Bas Assambleıasynyń tórinen estildi. Ol ǵaryshtan da estildi, búginde ınternettiń de tili. Otandyq aqparat quraldarynyń basym kópshiligi qazaqsha shyǵady. Esterińizde bolsa, bir kezde, Táýelsizdikke deıin Almatyda bir ǵana qazaq mektebi bar edi. Ótken 25 jylda elimizde qazaq tilinde bilim beretin 1 myńnan astam mektep ashyldy",-dep atap ótti Elbasy.
Osy oraıda Memleket basshysy qazaqtyń tili AQSh, Ulybrıtanııa, Germanııa, Qytaı, Ońtústik Koreıa, Majarstan, Polsha, Ázerbaıjan, Armenııa sııaqty elderdiń beldi ýnıversıtetterinde oqytylyp júrgendigin jetkizdi.
"Aıta keteıin, búgingi tańda mektep oqýshylarynyń úshten ekisinen astamy, stýdentterdiń 60 paıyzǵa jýyǵy memlekettik tilde bilim alyp jatyr. Elimiz boıynsha qazaq tilin oqytatyn 350 ortalyq tabysty jumys isteýde",-dedi Prezıdent.
Eske sala keteıik, 2015 jyldyń 29 qyrkúıeginde BUU BA-nyń 70-shi mereıtoılyq sessııasynda N.Nazarbaev atalmysh Uıymnyń minberinen qazaq tilinde baıandama jasady. Memleket basshysy kún tártibindegi meılinshe ózekti halyqaralyq máseleler boıynsha Qazaqstannyń ustanymyn jáne olardy sheshý joldaryn baıandady. Elbasy HXI ǵasyrda adamzattyń eń basty mindeti álemdi soǵys qaterinen múlde aryltatyn jáne onyń sebepterin joıatyn strategııany júzege asyrý bolýǵa tıis ekenine nazar aýdardy. Sol úshin Qazaqstan Prezıdenti Birikken Ulttar Uıymynyń júz jyldyǵyna Jahandyq Strategııalyq Bastama - 2045 josparyn ázirleýdi usyndy.
