Elbasy: Qazaq radıosy el Táýelsizdigin tuǵyrly etýge qaltqysyz qyzmet etip kele jatyr

ASTANA. QazAqparat - Astanada Qazaq radıosynyń 95 jyldyq mereıtoıy aıasynda IV Halyqaralyq «Uly Dala daýysy» radıofestıvaliniń gala-kontserti ótip, án dodasynyń jeńimpazdary saltanatty túrde marapattalady. Saltanatty sharaǵa QR Aqparat jáne kommýnıkatsııalar mınıstri Dáýren Abaev qatysyp, Elbasy Nursultan Nazarbaevtyń quttyqtaý hatyn tapsyrdy.

«Sizder bir ǵasyrǵa jýyq ýaqyt boıy jańalyqtyń jarshysy bolyp, halqymyzdy tanymy tereń, mazmuny zor habarlarmen sýsyndatyp kelesizder. Radıo qabyrǵasynda ár jyldary birtýar tulǵalar eńbek etti. Radıonyń torqaly toıy qasterli Táýelsizdigimizdiń 25 jyldyǵymen tuspa-tus kelip otyr. Táýlik boıy habar taratatyn Qazaq radıosy - el Táýelsizdigin tuǵyrly etýge qaltqysyz qyzmet etip kele jatqan buqaralyq aqparat quraldarynyń biri. El birligin nyǵaıtýǵa laıyqty úles qosýda. Búgingi mereıli shaqta zor densaýlyq, bereke-birlik pen shyǵarmashylyq tabystar tileımin. Jaǵymdy jańalyqtardyń jarshysy bolyp, Máńgilik eldiń myzǵymas qundylyqtaryn barsha halyqtyń júregine jetkize berińizder!», delingen Elbasy quttyqtaýynda.

Atap aıtqanda, radıofestıvalǵa Qazaqstan óńirlerinen jáne Túrkııadan, Belarýs elinen, Reseıden, Ýkraınadan 60 ánshi qatysyp, onyń 16-sy jeńimpaz atandy.

Sonymen, «Úzdik top» atalymynda «Rıngo» toby, «Jigitter arasyndaǵy úzdik jeke oryndaýshy» atalymynda Aıqyn Tólepbergen jáne «Jyldyń úzdik patrıottyq áni» atalymynda Nurǵalı Turlybekov («Qazaqstan» áni), «Úzdik estradalyq oryndaýshy» - Móldir Áýelbekova, «Úzdik etno-estradalyq oryndaýshy» retinde Ardaq Balajanova marapattaldy.

Budan bólek, dástúrli óner ókilderinen Armat Islamǵalıev «Jigitter arasyndaǵy úzdik dástúrli oryndaýshy» atalymyn, Zúlfııa Baımyrza «Qyzdar arasyndaǵy úzdik dástúrli oryndaýshy atalymyn ıelendi.

Al «Úzdik dombyrashy» atylymynda Jaras Satybaldıev, «Úzdik qobyzshy» atalymynda Saıan Aqmolda, «Ulttyq aspaptyq ujym» atalymynda «Saryarqa» ult aspaptar ansambili, «Úzdik etno-rok toby» atylymynda «Ulytaý» rok toby jeńimpaz boldy.
Munymen qosa, «Jańa esim» atalymynda Bashqurtstannan qatysqan Marsel Kýtýev (Sh. Qaldaıaqov «Ana týraly jyr»), ýkraındyq ıAn Kostyrko (E. Hasanǵalıev «Boztorǵaıym»), reseılik úmitkeri Chıngıs Lı (E. Hasanǵalıev «Aınalaıyn), Belarýs elinen qatysýshy Oksana Voıteshık («Súıgen júrek»), sondaı-aq Túrkııa memleketinen qatysýshy Jem Gúrdal (A. Jubanov, «Qarlyǵash») úzdik tanyldy.

Qazaq radıosynyń prodıýseri Aınur Sársenbekova «Uly dala daýysy» - radıofestıval retinde Qazaq radıosynyń efırinde 2012 jyldan bastaý alǵanyn aıta kele, onyń maqsaty - qazaq mýzykasynyń zamanaýı, básekege qabiletti tóltýmalyq dybysyn halyqaralyq deńgeıge nasıhattaý jáne tyńdaýshylarynyń talǵamynan shyqqan shyǵarmalar arqyly oryndaýshylyq ónerdi marapattaýǵa negizdelgenin atap ótti.