Elbasy: «Qazaq eline myń alǵys» monýmentiniń tarıhı mańyzy zor
Hatta Elbasy Astanany kórkeıtýge qosqan úlesi úshin Qaraǵandy oblysynyń ákimi men óńir halqyna shynaıy rızashylyǵyn bildirgen.
«Táýelsiz Qazaqstannyń sımvoly sanalatyn bas qalamyzdyń aıtýly mereıtoıy - barsha qazaqstandyqtarǵa ortaq qýanysh. Saryarqa tósine qazyǵyn qaqqan eńseli elordamyzdy turǵyzýǵa búkil halqymyz jumyla atsalysty. «Óńirlerdiń Astanaǵa tartýy» jobasy aıasynda Qaraǵandy oblysy da elordaǵa erekshe syı jasady. Elimiz úshin «Qazaq eline myń alǵys» monýmentiniń tarıhı mańyzy zor. Bul monýment bizdiń elge kúshtep kóshirilgen halyqtardyń qasiretti ómirinen syr shertip, qazaqtardyń darhandyǵy men adamgershiligin, kópultty qoǵamymyzdyń dostyǵy men birligin beıneleıdi» delingen alǵys hat mátininde.
Elbasy sonymen birge, Qaraǵandy oblysy Astanaǵa syıǵa tartqan «Ulytaý» alleıasy jaıly da sóz qozǵaıdy.
«Elordanyń Botanıkalyq baǵyndaǵy qaraǵandylyqtar salǵan «Ulytaý» alleıasy qalanyń sánin keltirip, turǵyndardyń súıikti demalys ornyna aınalatyn bolady. Astanany kórkeıtýge zor úles qosqan Sizge jáne óńir turǵyndaryna shynaıy rızashylyǵymdy bildiremin» deıdi N.Nazarbaev.
Eske sala keteıik, Qaraǵandy oblysy elordanyń 20 jyldyǵyna oraı «Ulytaý» alleıasy men «Qazaq halqyna myń alǵys» atty monýment tartý etken-di. «Ulytaý» alleıasy tarıhı-mádenı jádigerlerimen qundy. Alleıanyń uzyndyǵy - 250, eni - 55 metr. Saıabaqtyń bir ereksheligi - mundaǵy ár eskertkishke QR-kod qoıylǵan. Tartý-taralǵy qatarynda «Qazaq eline myń alǵys» monýmenti de bar. Qazaqstan halqy Assambleıasynyń usynysymen bıiktigi 13 jarym metr bolatyn eskertkish boı kóterdi. Bul - náýbet zamanda taǵdyrdyń tálkegine ushyrap, qazaq jerine jer aýdarylǵan ózge ultty baýyryna basqan qazaq halqyna taǵzym.
