Elbasy qatysýymen Jastar jylynyń ashylý saltanaty bastaldy
Shara bastalar aldynda «Jas qazaqstandyqtardyń jobalary» kórmesinde Qazaqstan Prezıdentine daryndy jastarymyzdyń «NNaimi.kz�, «Shoqan suits», «Qazaq eli», «Beyond», «Kusto Group» sekildi tabysty jobalary tanystyryldy.
Saltanatty rásimde Memleket basshysy Jastar jylynyń mańyzdylyǵy týraly sóz sóıleıdi dep kútilýde. Sonymen qatar QR Qoǵamdyq damý mınıstri Darhan Káletaevtyń elimizdegi memlekettik jastar saıasatynyń negizgi baǵyttary men jetistikteri týraly baıandamasy josparlanǵan.
Munan bólek spıkerler retinde ártúrli salada jetistikke jetken jastardyń belsendi jáne kreatıvti ókilderi, onyń ishinde jas kásipker Rasýl Abdýllaev, jas ǵalym ári startaper Ivan Krepak, eriktiler ókili Aısulý Ernııazova, agrarlyq sala ókili Tamıla Rozmetova sóz sóılemek.
Jastar jylynyń ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastardyń ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler kelgen.
Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan edi. Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.
