Elbasy: Q.Óskenbaev mınıstrdi de, Úkimetti de jerge qaratty - VIDEO
ASTANA. QazAqparat - Búgin Aqordada keńes ótkizgen Memleket basshysy Nursultan Nazarbaev Ulttyq ekonomıka mınıstri bolǵan Erbolat Dosaevtyń otstavkasyn qabyldap, onyń orynbasary - Qaıyrbek Óskenbaevty qyzmetin durys atqarmaǵany úshin jumystan bosatty.
«Nursultan Ábishuly, Sizdiń sheshimińizdi eskere otyryp, taǵy da aıtarym, Jer kodeksiniń jańa normalary kerek ózgerister dep oılaımyn. Jańa normalar álem elderiniń tájirıbesinde kezdesedi. Qoǵamdaǵy jaǵdaıdy eskere otyryp, Nursultan Ábishuly Sizden meni ulttyq ekonomıka mınıstri qyzmetinen otstavkaǵa ketý týraly ótinishimdi qabyldaýyńyzdy suraımyn. Osy sátti paıdalana otyryp, senim artqanyńyz úshin, Úkimette ártúrli qyzmetterdi senip tapsyrǵanyńyz úshin Sizge alǵys aıtqym keledi. Úkimettegi áriptesterimniń barlyǵyna da aıtar alǵysym bar», - dedi E.Dosaev Prezıdent aldynda sóz ala otyryp.
Buǵan qatysty Memleket basshysy: «Dosaev tıimdi jumys istegen mınıstrlerdiń biri, biraq dál myna jaǵdaıda men seniń otstavkańdy qabyldaımyn. Al, Óskenbaev (ulttyq ekonomıka vıtse-mınıstri bolǵan Qaıyrbek Óskenbaev - agenttik) bergen tapsyrmany oryndaı almady, sondyqtan, jumystan bosatamyz. Qaıyrbek Óskenbaev Jer kodeksine ózgerister engizý baǵytyn basqarǵan edi. Ol osy zań jobasyn ázirledi, ony qabyldaý jónindegi jumystardy tizgindedi. Biraq, seni de, Úkimetti de jerge qaratty», - dedi.
