Elbasy iri qara etiniń eksporttyq áleýetin damytý jobasyn qoldady - Ó. Shókeev
ASTANA. 19 qańtar. QazAqparat /Rýslan Ǵabbasov/ - Elbasy Nursultan Nazarbaev iri qara etiniń eksporttyq áleýetin damytý jobasyn qoldady.
Bul týraly búgin Úkimette atalǵan máselege baılanysty ótip jatqan keńeste Premer-Mınıstrdiń birinshi orynbasary Ómirzaq Shókeev málim etti.
Ótken aptada Elbasynyń aldynda Qazaqstannyń iri qara etiniń eksporttyq áleýeti boıynsha joba qaralǵanyna toqtalǵan Ó. Shókeev: «Atap aıtqanda, bul joba aıasynda biz tyńǵylyqty talqylaǵannan keıin Elbasy ony qoldady»,-dedi.
Osy oraıda birinshi Vıtse-premer bul joba iske asyrylsa, ol elimizdiń barlyq aımaqtaryn qamtıtynyn atap ótti. Osynyń aıasynda 2,5 myń fermerlik sharýashylyqtar qurylady. Bul jobaǵa jalpy 30 myń adamdy tartý múmkindigi bar. Bul joba ásirese halyqty eńbekpen qamtý problemalary oryn alǵan óńirlerde iske asyrylady. «QazAgro» holdınginiń málimetine qaraǵanda, atalǵan joba aıasynda aldaǵy 5 jylda 150 myń basqa arnalǵan 60-qa jýyq bordaqylaý alańdary qurylady. Sonymen qatar 72 myń mal basyna negizdelgen 54 sharýashylyq-reprodýktorlar, 2,5 myńǵa deıin fermerler sharýashylyqtary qurylady. Bul óz kezeginde jylyna 60 myń tonna kólemindegi eksportqa baǵyttalǵan etti óndirýge múmkindik beredi.
Aldyn ala esepteýler boıynsha aldaǵy 5 jylda jobany qarjylandyrýǵa jumsalatyn qarjy kólemi 148 mlrd. teńge kóleminde bolmaq. Qarjy kózderi retinde respýblıkalyq bıýdjet jáne holdıngke Ulttyq qor tarapynan bólingen qarjy ıgerilmek.
