Elbasy Iordanııanyń sırııalyq bosqyndarǵa kómegin joǵary baǵalady

ASTANA. QazAqparat - Iordanııanyń sırııalyq bosqyndarǵa kómegin búkil álm joǵary baǵalaýy tıis. Bul týraly búgin  Aqordada elimizge resmı saparmen kelgen Iordanııa Hashımıt Koroldiginiń Koroli Abdalla ІІ ben ál-Hýseınmen shaǵyn quramdaǵy kelissózder ótkizgen Elbasy Nursultan Nazarbaev aıtty, dep habarlaıdy QazAqparat.

«Siz bizdiń dıplomatııalyq qarym-qatynasymyzdyń 25 jyldyǵy  qarsańynda kelip otyrsyz. Osy jyldardyń ishinde óte senimdi  dostyqqa negizdelgen qarym-qatynas ornattyq. Joǵary deńgeıdegi kezdesýlerdiń qarqyny da joǵary. BUU men basqa da uıymdardy qosa alǵanda barlyq halyqaralyq uıymdarda ustanymdarymyz bir. Iordanııa Qazaqstannyń halyqaralyq arenadaǵy bastamalaryna qoldaý kórsetedi», - dedi Elbasy shaǵyn quramdaǵy kelissózder barysynda.

Memleket basshysy Qazaqstan men Iordanııa arasynda aýyl sharýashylyǵy, farmatsevtıka, qorǵanys salalaryndaǵy ózara qarym-qatynas artyp kele jatqanyn basa aıtyp ótti.  Sonymen qatar Iordanııa Koroliniń óńirdegi róline aıryqsha toqtaldy.

«Qazirgi ýaqytta mıllıondaǵan sırııalyq bosqyndardyń Sizdiń elińizde bolýyn, memleketińizdiń mol qarajat jumsap, gýmanıtarlyq kómek kórsetýin  búkil álem baǵalaýy tıis dep esepteımin», - dedi Nursultan Nazarbaev.

Buǵan deıin Nursultan Nazarbaevtyń Iordanııa Koroline «ıAdrolyq qarýsyzdaný men qaýipsizdikke qosqan úlesi úshin» syılyǵyn tabys etkenin habarlaǵan bolatynbyz .