Elbasy ınternet arqyly belgili reseılik saıasatker E. Prımakovtyń joldaǵan saýalyna jaýap berdi
A. Qarashanyń 13-i. QazAqparat /Qanat Mámetqazyuly/ ‑ Búgin respýblıkalyq telearnalar boıynsha ótip jatqan tikeleı jelide Qazaqstan Respýblıkasynyń Prezıdenti Nursultan Nazarbaev ınternet jelisi arqyly joldanǵan belgili reseılik saıasatker Evgenıı Prımakovtyń saýalyna jaýap berdi,
dep habarlaıdy QazAqparat.
Óziniń beıne-saýalynda E. Prımakov Memleket basshysynan Qazaqstannyń EQYU-ǵa tóraǵalyq etýine qatysty saýal qoıyp, «Qazaqstan tóraǵalyǵynan atalǵan uıymnyń belsendi bola túsetinin kútetinin» atap ótti. «Siz osy uıymdy jandandyra túsýge qatysty óz josparyńyzben bólise alasyz ba?», dedi E. Prımakov.
Óz kezeginde Elbasy reseılik saıasatkerge qazaqstandyq máselelerge qyzyǵýshylyq tanytqany úshin alǵysyn jetkizdi. «Ózderińizge belgili, Qazaqstan 2010 jyly EQYU-ǵa tóraǵalyq etýge ujymdyq tarap boıynsha usynylǵan bolatyn. Sondyqtan da bul biz úshin qurmetti oryn. Qazaqstan alǵash ret TMD elderi, Azııa jáne jalpy musylman álemi arasynda osy bedeldi halyqaralyq uıymǵa tóraǵalyq etetin bolady. Bul sharaǵa óte jaýapty qaraıtyn bolamyz. Meniń Jarlyǵymmen osy baǵytta jumys isteıtin arnaıy memlekettik komıssııa quryldy. Biz Eýropa memleketteri men TMD jáne Ortalyq Azııa elderi arasyndaǵy dıalogty jandandyra túsýge kúsh salamyz. Sonymen birge, eń bastysy, EQYU-nyń negizgi ólshemi bolyp tabylatyn «úsh korzınasynyń» damýy úshin bizdiń de usynatyndarymyz barshylyq. Bul «úsh korzınaǵa» ekonomıka, ekologııa máseleleri, qaýipsizdik jáne adamzattyq ólshemder jatady», dedi N. Nazarbaev.
