Elbasy Hanzada Fılıpptiń qaıtys bolýyna baılanysty kóńil aıtty

NUR-SULTAN. QazAqparat - Elbasy Hanzada Fılıpptiń qaıtys bolýyna baılanysty Ulybrıtanııa jáne Soltústik Irlandııa Qurama Koroldiginiń Patshaıymy ІІ Elızavetaǵa kóńil aıtý jedelhatyn joldady, dep habarlaıdy QazAqparat Elbasynyń resmı saıtyna silteme jasap.

Nursultan Nazarbaev Hanzada Fılıpptiń ómirden ótkeni týraly sýyt habardy kúızelispen qabyldady.

«Ol jarqyn ári maǵynaly ǵumyr keshti. Sizdiń senimdi tiregińiz bolyp, el múddesi jolynda naǵyz patrıot jáne halyqaralyq deńgeıdegi birtýar qaıratker retinde tarıhı iz qaldyrdy.

Ulybrıtanııa jáne Soltústik Irlandııa Qurama Koroldigine saparlarym barysynda Ózińizben jáne Hanzada Fılıppen bolǵan kezdesýlerde marqumnyń Qazaqstanǵa degen iltıpatty kóńili men ıgi nıetin árdaıym sezetinmin.

Sizdiń jáne týystaryńyzdyń qaıǵysyna ortaqpyn.

Osynaý azaly saǵatta, Uly Mártebeli, Sizge, otbasyńyzǵa, búkil Ulybrıtanııa jáne Soltústik Irlandııa Qurama Koroldiginiń halqyna sabyr tilep, kóńil aıtamyn», – delingen jedelhatta.