Elbasy halyqty reformalardy júzege asyrýǵa belsendi túrde qatysýǵa shaqyrdy
ASTANA. QazAqparat - Búgin Astanadaǵy Táýelsizdik saraıynda qaıta saılanǵan Qazaqstan Prezıdenti Nursultan Nazarbaev Qazaqstan halqyna ant berip, qyzmetine resmı kirisken soń sóılegen sózinde halyqty reformalardy júzege asyrýǵa shaqyrdy.
«Búgingi tańda bizdiń aldymyzda jańa qaterler tur. Al bizdiń buǵan jaýabymyz - memleketti nyǵaıtyp, ultty jańǵyrtý. Qazaq elinde «Asý bermes asqar joq» degen danalyq bar. Qazaqstandyq jol - bizdiń ultymyzdy bir maqsatqa, ortaq múddege jumyldyrdy. Saılaý - árbir qazaqstandyqtyń óziniń jeke basynyń, Otan aldyndaǵy jaýapkershiligin sezinetindigin kórsetti. Sondyqtan da men jarııalanǵan reformalardyń tabysty ótetinine, meniń halqym men memleketimniń tabysty bolatyndyǵyna senimdimin», - dedi Nursultan Nazarbaev.
«Men barsha halyqty jarııalanǵan reformalardy júzege asyrý úshin keńinen qatysýǵa shaqyramyn», - dedi N.Nazarbaev.
