Elbasy Gýmılev atyndaǵy EUÝ rektoryn qabyldady
ASTANA. QazAqparat - Memleket basshysy Nursultan Nazarbaev L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqovty qabyldady.
Bul týraly Aqorda baspasóz qyzmeti habarlady.
Kezdesý barysynda E.Sydyqov Memleket basshysyn ýnıversıtettiń ótken jyldardaǵy qyzmeti men qazirgi atqaryp jatqan jumystary jóninde habardar etti.
Nursultan Nazarbaev Qazaqstannyń ındýstrııalyq damý baǵdarlamasy úshin biliktiligi joǵary mamandar daıarlaýdyń mańyzdylyǵyn atap ótti.
- Elordany Astanaǵa aýystyrǵannan soń qabyldanǵan alǵashqy sheshimderdiń biri osy oqý ornyn qurý týraly boldy. Respýblıkamyzdyń bas qalasymen birge onyń ataǵy men abyroı-bedeli artyp keledi. L.N.Gýmılev atyndaǵy Eýrazııa ulttyq ýnıversıteti men ál-Farabı atyndaǵy Qazaq ulttyq ýnıversıteti elimizdiń joǵary oqý oryndarynyń aldyńǵy shebinde keledi, - dedi Qazaqstan Prezıdenti.
Rektor búginde ýnıversıtette 17 myńnan astam stýdent bilim alyp jatqanyn, onyń kóbi úsh tildi erkin meńgergenin málimdedi. Bul faktorlar bilim alýshylardyń akademııalyq mobıldiligine septigin tıgizýde.
- Oqý orny óz deńgeıin udaıy arttyryp keledi jáne qazirgi ýaqytta ol álemdik reıtıngte 345-oryndy ıelenip otyr. Ýnıversıtette jumys isteıtin sheteldik oqytýshylar, sondaı-aq jumys berýshiler stýdentterimizdiń daıyndyǵyna joǵary baǵa berýde. Eýrazııa ýnıversıteti túlekteriniń jumysqa ornalasý krıterııi jóninen respýblıkada aldyńǵy oryndardyń birin ıelendi. Bedeldi QS World University Rankings halyqaralyq reıtıng agenttiginiń (Ulybrıtanııa) zertteý qorytyndysy boıynsha, Eýrazııa ulttyq ýnıversıteti fızıka páninen álemniń úzdik ýnıversıtetteriniń qataryna qosyldy, - dedi E.Sydyqov.
Kezdesý qorytyndysy boıynsha Elbasy birqatar naqty tapsyrma berdi.
