Elbasy Germanııanyń Federaldyq kantslerine Gelmýt Koldiń qaıtys bolýyna baılanysty kóńil aıtty
ASTANA. QazAqparat - Qazaqstan Prezıdenti Nursultan Nazarbaev Germanııanyń Federaldyq kantsleri Angela Merkelge Gelmýt Koldiń qaıtys bolýyna baılanysty kóńil aıtý jedelhatyn joldady, dep habarlaıdy Aqordanyń baspasóz qyzmeti.
Memleket basshysy Germanııanyń burynǵy kantsleri Gelmýt Koldiń qaıtys bolǵany týraly habardy zor kúızelispen qabyldady.
«Óz halqynyń ardaqty perzenti ári patrıoty, elin biriktirýde jáne eýropalyq ıntegratsııany damytýda negizgi ról atqarǵan G.Kol álem tarıhynda asa kórnekti memleket qaıratkeri retinde óshpes iz qaldyrdy. Qazaqstan halqy G.Koldi ekijaqty dostyq qarym-qatynasty ornatýǵa jáne nyǵaıtýǵa zor úles qosqan parasatty tulǵa retinde árdaıym este saqtaıtyn bolady. Qaıǵyǵa ortaqtasyp, marqumnyń týǵan-týystaryna jáne barsha Germanııa halqyna kóńil aıtamyn», - delingen jedelhatta.
