Elbasy gaz ken oryndaryna geologııalyq barlaýdy jandandyrýdy tapsyrdy

ASTANA. QazAqparat - QR Prezıdenti Qaýipsizdik keńesiniń otyrysynda gaz ken oryndaryna geologııalyq barlaýdy jandandyrýdy tapsyrdy. Bul týraly búgin QR Energetıka mınıstrliginiń keńeıtilgen alqa májilisinde vedomstvo basshysy Qanat Bozymbaev aıtty, dep habarlaıdy QazAqparat tilshisi.

«Salanyń barlyq mindetterin júzege asyrý úshin resýrstyq bazalardy, tıisti máselelerdi odan ary pysyqtaý qajet. Osyǵan baılanysty 7 aqpan kúni ótken Qaýipsizdik keńesiniń otyrysynda Elbasy geologııalq barlaýdy, onyń ishinde gaz resýrstaryn barlaýdy jandandyrýdy tapsyrdy. Sondyqtan mınıstrlik QazMunaıGazben birge ázirlenip jatqan 2021-2025 jyldarǵa arnalǵan geologııalyq barlaý baǵdarlamasy aıasynda gaz ken oryndaryn geologııalyq barlaý jumystaryn jandandyrýy qajet. Birinshi vıtse-mınıstr Mahambet Dosmuhambetovke muny baqylaýǵa alýdy tapsyramyn»,- dedi Q.Bozymbaev.

Jalpy, onyń dereginshe, 2018 jyly elimizde 55,5 mlrd tekshe metr gaz óndirilgen. 2017 jylmen salystyrǵanda ósim 5 paıyzdy quraıdy. Al aǵymdaǵy jyly elimiz 55 mlrd tekshe metr gaz óndirýdi josparlap otyr.

Taýarlyq gaz óndirý kólemi de 54 paıyzǵa artyp, 33,3 mlrd tekshe metrge jetip otyr. Al suıytylǵan gazdyń ótken jylǵy óndirilgen kólemi 3,1 mln tonnany qurady.

«Eldiń gazdandyrylý deńgeıi 2019 jyldyń 1 qańtarynda 49,68 paıyzǵa jetti. 2017 jylmen salystyrǵanda 23 paıyz ósim bar. 9 mıllıon adam kógildir otynǵa qol jetkizgen. Al aǵymdaǵy jyldyń qorytyndysynda gazdandyrý deńgeıi 50,5 paıyzǵa jetetindigi josparlanǵan», - dedi Q.Bozymbaev.