Elbasy ǵaryshker A.Aıymbetovti Astana áýejaıynda qarsy aldy (FOTO)
Rekordsmen Gennadıı Padalka (Reseıǵarysh), qazaqstandyq ǵaryshker Aıdyn Aıymbetov, sondaı-aq Danııanyń alǵashqy astronavty Andreas Mogensen Qazaqstanda eseptelgen aýdan mańyna aman-esen qondy.
Jospar boıynsha 06:51-de Jezqazǵan qalasynan ońtústik-shyǵysqa qaraı 146 km qashyqtyqta Jerge sátti qonǵan ǵaryshkerler Astanaǵa Qazaqstan basshylarynyń saltanatty qarsy alý sharasyna attandy.
«Soıýzdiń» qonýyn qamtamasyz etý jónindegi izdeý-qutqarý qyzmetine 200-ge jýyq áskerı qyzmetker, bortynda arnaıy jabdyqtary bar 14 Mı-8 tikushaqtary, tórt An-12 jáne An-26 ushaqtary jáne 15 birlik tehnıka, sondaı-aq tórt jol talǵamaıtyn izdestirý-kóshirý mashınalary qatystyryldy.
Esterińizge sala keteıik, Aıdyn Aıymbetov 2 qyrkúıekte ǵarysh kemesimen Halyqaralyq ǵarysh stansasyna ushqan bolatyn. Otandasymyz munda birqatar ǵylymı tájirıbeler, atap aıtsaq ekologııa, fızıka jáne medıtsına salasynda zertteýler júrgizdi. Sondaı-aq, qazaq ulttyq taǵamdaryn ǵaryshkerler ratsıonyna engizý tájirıbeden ótkizildi.
HǴS segmentine qazaqstandyq ǵaryshkerdiń ushyrylym baǵdarlamasyn daıyndaýdy Qazǵarysh «Ulttyq ǵaryshtyq zertteý jáne tehnologııalar ortalyǵy» AQ-ǵa (UǴZTO) tapsyrylǵan. Baǵdarlama basshysy, «UǴZTO» AQ prezıdenti Jumabek Jantaev qazaqstandyq ǵaryshkerdiń ushyrylymyna kelisimshartqa qol qoıǵannan keıin QazAqparatqa bergen qysqasha suhbatynda Aıdyn Aıymbetov HǴS bortynda on eksperıment oryndaıtynyn aıtqan bolatyn. Olardyń ishinde tabıǵı-resýrstyq jáne geofızıkalyq monıtorıng boıynsha zertteý bar.
Aıta keteıik, Aıdyn Aıymbetov bul saparyn Qazaq handyǵynyń 550 jyldyǵyna, Ata zańymyzdyń 20 jyldyǵy men Jeńistiń 70 jyldyǵyna arnaıtyndyǵyn aıtqan bolatyn.
