Elbasy Frantsııa jáne Mysyr prezıdentterine kóńil aıttty

ASTANA. QazAqparat - Memleket basshysy Nursultan Nazarbaev Frantsýz Respýblıkasynyń Prezıdenti Fransýa Ollandqa jáne Mysyr Arab Respýblıkasynyń Prezıdenti Ábdel Fattah Ás-Sısıge kóńil aıtý jedelhattaryn joldady. Bul týraly Aqordanyń baspasóz qyzmeti.

Jedelhatta mysyrlyq avıakompanııa ushaǵynyń apatqa ushyraýy saldarynan kóp adamnyń qaza bolǵany týraly habardy Memleket basshysynyń zor kúızelispen qabyldaǵany atap ótilgen.

Nursultan Nazarbaev qaza bolǵandardyń týǵan-týystary men jaqyndaryna, sondaı-aq mysyr jáne frantsýz halyqtaryna Qazaqstan halqynyń jáne jeke óziniń atynan kóńil aıtty.

Eske sala ketsek, búgin Mysyrdyń Azamattyq avıatsııa mınıstrligi EgyptAir avıakompanııasynyń A320 laıneriniń apatqa ushyraǵanyn rastady. Ushaq kúndiz Parıjden Kaırge bet alǵan, Mysyr jaǵalaýynan shamamen 280 shaqyrym jerde radardan joǵalyp ketti.

Ushaqta 12 memlekettiń azamattary bolǵan. Jolaýshylardyń jalpy sany - 56. Ekıpaj músheleri segiz nemese toǵyz bolýy múmkin dep habarlanýda.