Elbasy energetıka mınıstri Qanat Bozymbaevty qabyldady
Kezdesýde Memleket basshysyna Qaýipsizdik keńesiniń bıylǵy 7 qarashadaǵy otyrysynda berilgen tapsyrmalardyń oryndalý barysy týraly baıandaldy.
- Mınıstrlik osy jyldy barlyq baǵyttar, sonyń ishinde munaı óndirý, elektr energııasy, balamaly energııa kózderi, geologııalyq barlaý salalary jáne iri ınvestorlarmen jumys júrgizý máselesi boıynsha jaqsy kórsetkishtermen aıaqtaǵaly otyr, - dedi Qazaqstan Prezıdenti.
Nursultan Nazarbaev tarıfterge baqylaý júrgizý jaýapkershiligi tek Energetıka mınıstrligine emes, sondaı-aq Ulttyq ekonomıka mınıstrligine de júktelgenin atap ótti.
- Tarıfterge qatysty syn aıtyldy. Oǵan Energetıka mınıstrligi ǵana jaýapty emes. Elektr energııasy kózi men ony tasymaldaýǵa Energetıka mınıstrligi jaýap beredi, al ony qaıta bólý men tutynýshylarǵa jetkizý isin baqylaýdy Monopolııaǵa qarsy komıtet júzege asyrady, - dedi Memleket basshysy.
Qazaqstan Prezıdenti energetıkalyq qyzmet kórsetý naryǵyndaǵy tarıfterdi qalyptastyrý jáne baqylaý úderisinde Úkimettiń basty ról atqaratynyn atap ótti.
- Jyl saıyn Energetıka mınıstrligi Úkimet otyrysynda tarıfterdi tómendetý qajettigi jóninde baıandap keldi. Bul máseleler boıynsha Premer-Mınıstr men Úkimet sharalar qabyldamady. Osy salada tártip ornatýdy bárine tapsyramyn. Jaýapty vedomstvolardyń bári mınıstrliktiń qaramaǵynda bolýǵa tıis nemese Úkimet bul úderisti ózi úılestirgeni jón, - dedi Nursultan Nazarbaev.
Q.Bozymbaev Memleket basshysyna stantsııalarda elektr energııasyn óndirýdiń shekti tarıfterin bekitý úshin atqarylǵan jumystardyń nátıjeleri jóninde málimdedi.
- Jeltoqsan aıynyń birinshi onkúndiginde saýda básekesi ótkiziledi. Sonyń nátıjesinde qýattylyq tarıfi anyqtalady. Sol ýaqytta osynyń negizinde elektr energııasynyń shekti tarıfterin bekitemiz. Olar stantsııalardyń tıpterine qaraı ártúrli bolady. Biraq, stantsııanyń túrlerine baılanysty, ortasha eseppen alǵanda, 5 paıyzdan 20 paıyzǵa deıin tómendeıtin bolady, - dedi Energetıka mınıstri.
Kezdesý barysynda Ulttyq ekonomıka mınıstrligi Tabıǵı monopolııalardy retteý, básekelestikti jáne tutynýshylardyń quqyǵyn qorǵaý komıteti tarapynan óńirlik stantsııalar men elektr qýatymen qamtamasyz etetin uıymdardyń tarıfterin tómendetý úshin jumys júrgizý qajettigi týraly aıtyldy.
Kezdesý sońynda Memleket basshysy mınıstrliktiń elektr energııasy naryǵyndaǵy tarıfterdi retteý jónindegi tásilderin maquldap, birqatar naqty tapsyrma berdi.
