Elbasy eńbek ónimdiligin ary qaraı arttyrýǵa ǵylym jetistigin tartýdy usyndy
ALMATY. QazAqparat - QR Prezıdenti Nursultan Nazarbaev QR UǴA-nyń 70 jyldyq mereıtoıyna arnalǵan QR Ulttyq ǵylym akademııasynyń Jalpy jınalysynyń saltanatty sessııasynda Almaty oblysyndaǵy «Baıserke» sharýa qojalyǵyn úlgi retinde atady, dep habarlaıdy QazAqparat tilshisi.
«Temirhan Dosmuhamedov jetekshilik etetin «Baıserke» qojalyǵy shaǵyn kásiporynnan salmaqty kompanııaǵa aınaldy. Onda akademıkter jumys isteıdi, olar bilimin salyp, óz qoldarymen ǵajaıyp kórsetip jatyr. Bıdaı ósimi gektaryna 50 tsentnerge jetedi. Biz 13 tsentner alǵan kúnderi qýanamyz», - dedi Memleket basshysy.
«Eńbek ónimdiligi artyp keledi, biraq ary qaraı ǵylymdy iske qospasaq ol ary óspeıdi. Bul jerde ǵylymdy kásiporyndarǵa aralastyrý máselesi bar. Mundaı mehanızm jeke bıznestiń mindetti qarjylandyrýy arqyly bolýy kerek. Mysaly, Sıngapýrde ǵalymǵa bıznesten qansha tapsa, sonsha qarjy beretin ereje bar. Solaı bolýy kerek. Osyndaı jolmen ǵana patentteýdiń úlesin arttyryp, ǵylymǵa quıylatyn jeke ınvestıtsııany kóbeıtýge bolady. Qoldanbaly tabystardyń negizi qozǵaýshy kúshi jeke sektor bolýy qajet. Bizdiń aldymyzda ımportty almastyryp, ekporttyq óndiristi damytý mindeti tur», - dedi N.Nazarbaev.
Aıta keteıik, búgin Abaı atyndaǵy Qazaq memlekettik akademııalyq opera jáne balet teatry ǵımaratynda QR Prezıdenti, QR UǴA akademıgi Nursultan Nazarbaevtyń qatysýymen QR UǴA-nyń 70-jyldyq mereıtoıyna arnalǵan QR UǴA-nyń Jalpy jınalysynyń saltanatty sessııasy ótti.
Sessııa jumysyna akademıkter, korrespondent-músheleri, QR UǴA-nyń qurmetti músheleri, JOO rektorlary, ǴZI dırektorlary, eldiń kórnekti qoǵamdyq jáne mádenıet qaıratkerleri, sheteldik qonaqtar ǵylym akademııalary prezıdentteri qatysty.
