Elbasy: Eń birinshi alǵysym halqyma arnalady
ASTANA. QazAqparat - Búgin Astanada ótip jatqan Jeńimpazdar forýmynda sóz sóılegen QR Prezıdenti Nursultan Nazarbaev barsha qazaqstandyqtarǵa saılaýdaǵy qoldaýy úshin alǵysyn bildirdi.
«Qurmetti halqym! Qazaqstandyqtar! Búgin elimiz úshin taǵy bir umytylmas tarıhı kezeń boldy. Ózderińizge belgili, jańa ǵana Ortalyq saılaý komıssııasynyń málimdemesi boldy. Elimizdiń 95 paıyzdan artyq saılaýshylary qatysqan sharada maǵan 97,7 paıyz daýys berdi. Eń birinshi alǵysym - halqyma. Meniń jurtym osy jyldardyń barlyǵynda qoldap, meniń artymnan erip, shylbyr men tizgindi bir qolyma ustatyp, senip kele jatqan otandastarymnyń jappaı senimin oryndaý qadirmendi mindet. Osy mindetti atqarý úshin ózimniń kúsh-jigerimdi, densaýlyǵymdy, tájirıbemdi aıamaı qyzmet ete bermekpin dep ant bergenmin. Men sol antty oryndap kele jatyrmyn», - dedi N.Nazarbaev.
Sonymen qatar Elbasy saılaýdy ótkizýge belsendilik tanytqan «Nur Otan» partııasynyń múshelerine, Qoǵamdyq komıssııa múshelerine, 10 myńnan astam shtab múshelerine alǵysyn jetkizdi.
«Olar meniń baǵdarlamamdy halyqqa túsindirdi. Barshalaryna shyn júrekten alǵys aıtamyn. Belsendi qatysqan jastarǵa da rızashylyǵymdy bildiremin. Barlyq istelip jatqan sharýany Qazaqstannyń bolashaǵy myǵym, Táýelsizdigimizdiń tuǵyry bıik bolýy úshin, máńgilik bolýy úshin istep jatyrmyz. Bul jastar úshin, bolashaq úshin! Olar Otanyn súıip, eli úshin qyzmet etedi dep senemin», - dedi Memleket basshysy.
