«Elbasy emtıhandy sátti tapsyrdy» - respýblıkalyq basylymdarǵa sholý
***
Keshe Astanadaǵy Táýelsizdik saraıynda «Nur Otan» halyqtyq-demokratııalyq partııasynyń kezekti HІІІ sezi bolyp ótti. Onda Memleket basshysy, «Nur Otan» partııasynyń Tóraǵasy Nursultan Nazarbaev sóz sóıledi. Osyǵan oraı «Egemen Qazaqstan» gazetiniń senbilik sanynda «Asqaraly asýlar aıqyndaldy» degen taqyryppen kólemdi maqala jarııalandy. Basylymnyń jazýynsha, Memleket basshysy óziniń sózinde aldymyzda turǵan birqatar sheshýshi basymdyqtar týraly áńgimeledi. Birinshi másele retinde qazaqstandyqtar ómiriniń joǵary deńgeıin qamtamasyz etýge mán berildi. Aldaǵy on jyldyqta biz jumyssyzdyq deńgeıin 5 paıyzǵa deıin tómendetemiz. 2014 jylǵa qaraı somasy 8,1 trıllıon teńge bolatyn 294 ınvestıtsııalyq jobalardy júzege asyrý josparlanýda. Júz myńdaǵan jańa turaqty jumys oryndary qurylatyn bolady. Jańa eńbekpen qamtý strategııasynyń basty maqsaty - azamattardyń tabystaryn arttyrý. Qazaqstandyqtar - jańa baǵdarlamaǵa qatysýshylar oqýǵa jáne jańa kásipter meńgerýge daıyn turýlary kerek. Ózderin ózderi jumyspen qamtyp júrgenderdi eńbekke ornalastyrýdyń máni osynda.
Sondaı-aq osy basylymda joǵarydaǵy taqyrypty jalǵaǵan kelesi maqala «Táýelsiz eliń bar, el bastar eriń bar!» degen taqyryppen berilgen. Jarııalanym sezd barysynda sóz alǵan elimizge esimi tanymal azamattardyń sózderimen tuzdyqtalǵan. «Keshe Táýelsizdik saraıynda «Nur Otan» halyqtyq-demokratııalyq partııasynyń HІІІ sezi bolyp, onda elimizdiń barlyq aýmaqtarynan kelgen 600-den astam delegat Qazaqstan Prezıdenti, partııa Tóraǵasy Nursultan Nazarbaevty aldaǵy bolatyn saılaýǵa prezıdenttikke kandıdat etip usyndy. Sezge delegattardan basqa eki myńnan astam shaqyrylǵan qonaqtar kelgen eken. Olardyń ishinde elimizge barynsha tanymal saıasat, qoǵam jáne mádenıet qaıratkerleri, sheteldik dıplomatııalyq mıssııalar men partııalar, halyqaralyq, jastar, úkimettik emes uıymdar ókilderi bar», - dep jazady basylym. Bul eki maqalanyń baıybyna barǵyńyz kelse, el gazeti «Egemen Qazaqstannyń» búgingi nómirin jiberip almańyzdar.
***
«Keshegi juma saıası oqıǵalarǵa toly boldy. Ásirese, Memleket basshysy N.Nazarbaev úshin tolassyz jumys kúnine aınalǵandaı. Túske deıin «Nur Otan» halyqtyq demokratııalyq partııasynyń HІІІ sezine qatysqan Elbasy, tús aýa Ortalyq saılaý komıssııasyn betke aldy. Munda aldaǵy sáýirde ótetin kezekten tys prezıdenttik saılaýǵa qatysý úshin ótinish berdi. Sóıtip, hanǵa da, qaraǵa da ortaq talap boıynsha barlyq úmitkerler sekildi Prezıdenttikke kandıdattardyń memlekettik tildi meńgerýin anyqtaý jónindegi lıngvıstıkalyq komıssııanyń qazaq tilinen emtıhan tapsyrdy», - dep jazady «Aıqyn» gazeti senbilik nómirindegi «Elbasy emtıhandy sátti tapsyrdy» degen maqalasynda. Emtıhannan shyqqannan keıin jýrnalısterge suhbat bergen N.Nazarbaev mundaı synaqty birinshi ret tapsyryp otyrmaǵanyn atap ótken. «El Konstıtýtsııasyna sáıkes basqa kandıdattar sııaqty men de bul emtıhannan óttim. Emtıhandy sátti tapsyrdym jáne olar ony qabyl aldy dep esepteımin. Qazaq tili - Qazaqstan Respýblıkasynyń memlekettik tili. Qazaq tilin árbir azamat bilýi tıis», - deıdi N.Nazarbaev.
«Aıqyn» gazetiniń dástúrli «Aq sóıle!» aıdarynda aýyr atletıkadan Qazaqstan ulttyq quramasynyń aǵa bapkeri Vılorıı Pakpen aradaǵy suhbat «Jalpy, qazaq jerinde talantty jastar jeterlik» degen taqyryppen berilgen. Basylymnyń barlyq saýaldaryna tuşymdy jaýap bergen ol Qazaq jerinde týyp-ósip, qazaqtyń qasıetti topyraǵynan nár alǵan azamattyń qazaq tilin bilmeýi uıat ekendigin, óziniń memlekettik tildi ǵana emes, qazaqtyń mádenıeti men salt-dástúrin de jaqsy biletindigin basa aıtqan. Tilshiniń keıbir mamandardyń "qazaqtar tek boks pen kúreske ǵana beıim" degen sózderin alǵa tartyp, buǵan ne deısiz degen saýalyna ol: «Bul - bos sóz. Sandyraq. Jalpy, qazaq jerinde talantty jastar jeterlik. Daryndylardy iri qalalardan da, aýyldy jerlerden de tabýǵa bolady. Solardy kóptiń ishinen jazbaı tanyp, durys baptaı alsań bolǵany. Sonda talaı órenniń baǵy ashylatyny sózsiz. Osy oraıda "Eger olaı bolsa, qazaqtar arasynan chempıondar nege shyqpaı jatyr?" degen saýaldyń týyndaýy zańdy. Oǵan aıtar jaýabym daıyn. Óıtkeni birqatar sport túrleri boıynsha bapkerlik qyzmet atqaryp júrgender - ózge ult ókilderi. Solardyń kóbiniń qazaq jastaryn tárbıelep, úlken arenaǵa shyǵarýǵa asa qulqy joq. Basty sebep - osy», - deıdi.
***
«Soldatskoe ýşele» degendi «Azıada shatqaly» dep ózgertsek qaıtedi...». Osy taqyryppen «Alash aınasy» gazetiniń senbilik nómirinde jaryq kórgen maqalada Dúnıejúziniń nazaryn bir ózine aýdartqan jetinshi qysqy Azııa oıyndaryn eshqashan umytylmastaı, halyq jadynda máńgige saqtap qalý maqsatynda oıyndar ótken nysandardyń birin Azıadanyń qurmetine «Soldatskoe ýşele» degendi «Azıada shatqaly» dep ataýdy usynady. Sondaı-aq jarııalanymda bilikti mamandardyń pikiri de berilgen. Máselen, shańǵy sportynan ulttyq quramamyzdyń bas bapkeri: Aleksandr Batıaıkın «Men bul usynysty eki qolymdy kóterip, qoldaımyn. Sebebi Aq Azıada elimizde tuńǵysh ret ótti. Onyń ústine, bul jerdegi shańǵy-bıatlon stadıony Azııa oıyndaryna arnaıy salyndy», - deıdi. Al Almaty oblysy tilderdi damytý basqarmasy, taldaý, úılestirý jáne onomastıkalyq jumys bóliminiń bas mamany Ermek Aqshabaev: «Óte tamasha usynys eken. Bul bastamany qoldaıtyndar bolsa, biz qostaýǵa daıynbyz. Onyń ústine, eshkim álgi jerdi qazaqsha «Sarbazsaı» atamaıdy. «Soldatskoe ýşele» dep júr. ıAǵnı, oryssha ataý. Sondaı-aq Talǵar aýdanynyń jer-sýlarynda «Soldatskoe ýşele» dep bekitilgen ataý múldem joq. Ol jaı halyq aýzynda solaı atalyp ketken. Al ony qujattastyryp, «Azıada shatqaly» dep atasaq ózimizge jaqsy emes pe? Elimizde tuńǵysh ret ótken qysqy Azııa oıyndaryn máńgilikke halyq jadynda saqtalatyndaı etsek, qandaı ǵanıbet»,- deıdi.
***
«Alash aınasy» gazetiniń jazýynsha, búginde qudyq qazatyndar qat mamandardyń qataryna enýi múmkin. Óıtkeni ońtústik óńirinde aýyzsý tapshylyǵy osy mamandarǵa degen suranysty arttyryp tur. Bul jaıynda basylymnyń búgingi nómirinde jaryq kórgen «Ońtústikke qudyq qazýshylar kerek» degen maqalada tarqatyla jazylǵan. «Arǵy jyldary Uzynaryq aýylyna sý qubyrlary júrgiziletin bolyp, kóshe-kósheniń bárin qazyp, qubyr tastady. Aýyldyqtar bórkin aspanǵa atyp qýanǵan. Alaıda bul kózboıaýshylyqtyń sozylǵanyna da eki jylǵa jýyqtady. Sý da joq, berilgen ýáde de qumǵa sińgen sýdaı boldy. Kómilgen qubyrlardyń shirip ketkenine shák keltirmeıtinderdiń qatary artty. Osy sebepten de búginde qudyq qazýshylardyń tasy órge domalap tur. Bul kásipti násip etkender qudyqtyń bir metrin 1,5-2 myń teńgeden qazyp júr. Oıly-qyrly jer bolǵandyqtan bireýlerdiń aýlasynan 20 metrden sý shyqsa, endi bireýlerdikinen 28-35 metrden shyǵyp jatady. Esepteı berińiz. Apta ishinde, bolmasa eki aptada ájeptáýir aqshanyń basyn qurap, qaltaǵa basady», - delingen maqalada.
***
«Kazahstanskaıa pravda» gazetiniń búgingi sanynda «Nur Otan» halyqtyq demokratııalyq partııasynyń HІІІ sezine oraı «Strategııa edınstva, protsvetanııa ı progressa» degen taqyryppen kólemdi maqala jarııalandy. Basylymnyń atap ótýinshe, Shákárim atyndaǵy Semeı memlekettik ýnıversıtetiniń rektory, QR Prezıdentiniń ókilettigin referendým arqyly uzartý jónindegi referendým ótkizý týraly bastamashy toptyń jetekshisi bolǵan Erlan Sydyqov Nazarbaevty partııanyń atynan 2011 jyly 3 sáýirde ótetin kezekten tys Prezıdenttik saılaýǵa kandıdat retinde usyndy. «Osylaısha men partııanyń búkil múshesiniń kóńilin bildirip otyrǵanyma senimdimin. 5 mıllıonnan astam qoldyń jınalǵandyǵy qazaqstandyqtardyń Elbasy keleshekte de memleketti ózi basqara berýin qalaıtynyn kórsetti», - dedi ol.
