Elbasy elimizdiń órkendep damýyna eńbek etedi dep senemiz – kásipker Serikjan Seıtjanov

ShYMKENT. QazAqparat – Shymkenttik kásipkerler Elbasy Nursultan Nazarbaevtyń densaýlyǵyna alańdaýshylyq bildirip, tezirek saýyǵyp ketýine tilektestigin jetkizdi. Qaladaǵy «Standart tsement» kompanııasynyń basshysy Serikjan Seıtjanov Tuńǵysh Prezıdenttiń Qazaqstan halqy úshin áli de kóp eńbek etetinine senimdiligin bildirdi, dep habarlaıdy QazAqparat tilshisi.

«Elbasy Nursultan Nazarbaev elimizdiń ósip órkendeýine, qaryshtap damýyna úlken úlesin qosty. Qazaqstan Respýblıkasynyń álemge tanylyp, damyǵan memleketterdiń qataryna qosylýyna kóp eńbek etti. Dúnıejúzin jaılaǵan qaýipti derttiń elimizdi, qala berdi Elbasyn aınalyp ótpegeni bizdi alańdatyp otyr. Alladan suraıyq, ol kisi erterek saýyǵyp ketsin. Tezirek aıaqqa turyp, elimizdiń órkendep, damýyna kóp eńbek etedi dep seneıik. Qazaqta aıtady ǵoı «aýyryp turdym, aýnap turdym» dep, sol aıtpaqshy erterek jazylyp ketýine tilektespiz. Biz búkil ujymymyzben ol kisige amanshylyq, denine saýlyq tileımiz. Álemge jetken náýbet elimizdi aınalyp ótsin, Elbasy bastap bul qıynshylyqtan da ótip keteıik»,- deıdi Serikjan Seıtjanov.