Elbasy eldiń sózin sóıledi

ASTANA. QazAqparat - Eki ıyǵynan demalyp turǵan Qazaqstan ústinen aýyr júk túskendeı erkin tynys aldy desek artyq emes. Óıtkeni, ekige jarylǵan qoǵam Elbasy Nursultan Ábishuly Nazarbaevtyń jer máselesine aıtqan sońǵy sózinen keıin qaıta tutasa birikti. Eldiń kópten kútken senimi aqtalyp, Prezıdent táýelsizdigi nebári shırek ǵasyrǵa jýyqtaǵan Qazaqstanda halyq úshin jumys isteıtin kepil ekenin taǵy da dáleledi. Bul pikirdi QazAqparat tilshisine Qazaq memlekettik qyzdar pedagogıkalyq ýnıversıtetiniń rektory Dınar Nóketaeva bildirdi.

«Bir nárseniń basy ashyq. Sońǵy ýaqytta jerge baılanysty oryn alǵan oqıǵalar Qazaqstan qoǵamyn saıası turǵydan ósire túskeni anyq. Bul elimizdegi demokratııalyq jolmen órkendep kele jatqanyn kórsetedi. Demokratııanyń basty qundylyǵy halyq pikirimen sanasa otyryp, ádil sheshim qabyldaý, sol arqyly el ishindegi tepe-teńdikti saqtaý. Memleket basshysynyń Aqordada ótken keńeste úlken rezonans týdyrǵan «Jer týraly» kodekstiń keıbir normalaryna bir jylǵa maratorıı jarııalaýy kez kelgen búkilhalyqtyq pikirdi jaqtaıtynyn aıǵaqtaıdy. Qazirde Elbasynyń «Bizge halyqqa unamaıtyn zańnyń qajeti joq» degen bir aýyz sóziniń ózi qoǵamda qyzý talqyǵa túsip, qalyń jurtshylyq arasynan qoldaý taýyp otyr», - dedi ol.

Onyń paıymynsha, qandaı da bir saıası kózqarasta asyǵys sheshim qabyldaýǵa bolmaıtyny sekildi ekonomıkada da tondy kelispeı pishýge bolmaıdy. «Jeti ret ólshep baryp kesilmegen» tirlik erteńgi kúni san soqtyrýy múmkin. Al qoǵam músheleriniń eń jandy tusy jer máselesinde jan-jaqty oılastyrmaı qımyl jasaý tipti óte shetin kúrdelilik. Óıtkeni, Elbasy aıtqandaı, «Jer eń birinshi halyqtyki».

«Qazaq halqy «Jer baılyqtyń anasy bolsa, ákesi eńbek» deıdi. Zańdy murageri halyq bolyp tabylatyn memlekettiń menshigindegi jer eldiń ıgiligine jumys istegenin barlyq adam maqul kóredi. Biraq, qandaı jolmen? Osyny aldaǵy ýaqytta Úkimet halyqpen birlese otyryp Prezıdenttiń aldyna qoıatyn bolady. Bul naǵyz álemdik praktıkaǵa saı jasalǵan Qazaqstannyń demokratııalyq qadamy», - dedi ýnıversıtet basshysy.

Sonymen qatar ol halyqtyń bir-birin sabyrǵa shaqyryp, osy ýaqyt ishindegi eń basty baılyǵymyz Táýelsizdikti saqtaý ekenin uǵynǵany qatty qýantqanyn basa aıtady.

«Bul bizdiń el turǵyndarynyń álemdik qaqtyǵystardan boılaryn aýlaq salyp, eldik dástúr men bolashaqty oılaıtyndaryn aıshyqtaıdy. Óıtkeni, egemendikti qorǵaý eldiń de, Elbasynyń eń basty maqsaty. Qurylatyn komıssııaǵa «halyqtyq usynystarmen birge «Jer týraly» kodeksti egjeı-tegjeıli qarap, Parlamentpen birge kelisimge keletin bolsa ǵana moratorııdi alý» jóninde talap qoıǵan Nursultan Nazarbaevty barsha Qazaqstan azamattary birliktiń brendi ǵana emes, memlekettiń negizgi kepili retinde jaqsy túsinedi. Sondyqtan da sońǵy sózdi Elbasydan kútetin. Keshe bul senim taǵy da aqtaldy», - dedi D.Nóketaeva.