Elbasy ekonomıkany damytýda álem elderi bet burǵan baǵyttardy atady
«Jahandyq trend - ol energetıkalyq revolıýtsııa, álemniń taza energetıkaǵa qaraı jyljýy. Tek 30 jylda jańaratyn energııa kózderinen alynatyn energııa kólemi 13 esege ósti. Sońǵy 5 jylda kún panelderiniń quny 2 esege jýyq tómendedi. Elektromobılderge degen betburys baıqalýda. Sarapshylardyń aıtýynsha, eger de avtoparkti elektrokarlarǵa aýystarsa, bul óz kezeginde Jerdegi aýany 200 jyl burynǵy deńgeıge deıin tazartýǵa múmkindik beredi», - dep toqtaldy Elbasy.
Prezıdent elder ekonomıkasynyń damýyndaǵy birinshi josparǵa tsıfrlyq tehnologııalar men jańaratyn energııa kózderi shyǵyp otyrǵanyn atap ótti.
«Tabıǵı resýrstarǵa álemdik suranystyń saqtalýyna qaramastan, bul resýrstar búginde aıtarlyqtaı basymdyqqa ıe emes jáne elder úshin joǵary tabystyń kózi bolmaı otyr. Osy oraıda energetıkalyq naryqtardyń barlyq iri oıynshylary, ıaǵnı korporatsııalar men elder jańa energetıkaǵa aýqymdy ınvestıtsııalar salýmen aınalysýda», - dedi N. Nazarbaev.
Bul rette Memleket basshysy ótken jylǵy EKSPO-2017 kórmesine toqtaldy.
«Qazaqstan bul protsesten tys qalyp otyrǵan joq. Atap aıtqanda «Bolashaq energııasy» taqyrybynda sátti ótken «EKSPO-2017» halyqaralyq kórmesi elde jasyl ekonomıkany júıeli damytýǵa baza boldy. Jalpy, 2030 jylǵa qaraı bizdiń energııalyq balanstaǵy balamaly energııa úlesi 30 paıyzǵa deıin jetkiziledi», - dedi Prezıdent.
