Elbasy: EAEO elderiniń saýda aınalymy 55 mlrd dollarǵa jetti
Bul týraly Joǵary eýrazııalyq ekonomıkalyq keńestiń Qurmetti tóraǵasy, Qazaqstannyń Tuńǵysh Prezıdenti – Elbasy Nursultan Nazarbaev aıtty.
«29 mamyrda Eýrazııalyq ekonomıkalyq odaq týraly kelisimshartqa bizdiń eldiń astanasynda qol qoıǵanymyzǵa 7 jyl tolady. Búginde birlesip kúsh jumsaýdyń arqasynda EAEO álemniń ekonomıkalyq arhıtektýrasynan júıeli oryn alǵanyn ásireleýsiz aıtýǵa bolady. Sońǵy bes jylda elderimizdiń ózara saýdasy 21 paıyzǵa ósip, 2020 jyly 55 mlrd dollarǵa jetti. Bul - daǵdarys jaǵdaıyndaǵy kórsetkish. Áıtpese biz odan da úlken jetistikterge jete alamyz», - dedi Elbasy Joǵary Eýrazııalyq ekonomıkalyq keńestiń otyrysynda.
Nursultan Nazarbaev pandemııa jaǵdaıynda odaq aıasyndaǵy baılanystardyń beriktigi synaqtan ótip jatqanyn eske saldy.
«Koronavırýs pandemııasymen kelgen ekonomıkalyq daǵdarys bizdiń ıntegratsııalyq birlestigimizdiń beriktiginiń synaǵyna aınaldy. Qaýipsizdik máselesi birinshi orynǵa shyǵyp otyr. Bul azyq-túlik, dári-dármek, tsıfrlyq jáne qarjylyq ınfraqurylym sııaqty birneshe salanyń keń aýqymyn qamtıdy», - dedi Elbasy.
