Elbasy dıeta ustap, aryqtaǵysy keletinderge aqylyn aıtty
ASTANA. QazAqparat - Búgin Memleket basshysy Nursultan Nazarbaev aǵymdaǵy jyldy qorytyndylap telearna jýrnalısterine suhbat bergen bolatyn.
Áńgime barysynda jýrnalıster tarapynan salaýatty ómir saltyna, arnaıy dıeta ustaýyna qatysty saýal qoıylǵan edi. «Qazir jurttyń kópshiliginiń problemasy - aryqtaý. Aryqtardyń ózi odan saıyn aryqtasamyn dep júr. Dıeta týraly aıtady, et bolmaıdy, maı bolmaıdy degen sekildi. Biz, qazaqtar, qalaı etsiz ómir súremiz? Bir urydan «urlyqty qashan qoıasyń» dese, «jylqy etiniń táttiligin qoısa, men urlyǵymdy qoıar edim» degen eken. Sol sekildi meniń prıntsıpim - adam ózine, óziniń organızmine qajettini jeýi kerek», - dedi Elbasy. Bul rette N.Nazarbaev professor Sharmanovty mysalǵa keltirip, adam densaýlyǵy úshin jylqy eti de, qymyzy da paıdaly ekenin aıtty. «Bizdiń súıegimizge sińgen, genetıkamyzǵa ornyqqan jaǵdaıymyz bar. Ony ózgertýge bola ma? Ekinshi - sport. Adam ózin-ózi kútýi kerek. Biz deni saý, salamatty ult bolýǵa tıispiz. Ózim týraly aıtsam, men eshqandaı da dıeta ustanbaımyn», - dedi N.Nazarbaev.
