Elbasy dári-dármek baǵasynyń sharyqtaýyna tosqaýyl qoıýdy tapsyrdy
ASTANA. QazAqparat - Búgin altynshy saılanǵan QR Parlamentiniń úshinshi sessııasyn ashý barysynda sóz sóılegen QR Prezıdenti Nursultan Nazarbaev dári-dármek salasynda týyndaǵan máselelerdi retke keltirýdi tapsyrdy, dep habarlaıdy QazAqparat.
«Dári-dármek zattarynyń aınalymy mańyzdy áleýmettik sıpatqa ıe. Salada baǵanyń sharyqtaýyna tosqaýyl qoıatyn sharalar qajet, sondyqtan dárilik jáne medıtsınalyq zattardyń aınalymyn retteý kerek bolyp tur. Qazaqstandyqtar qoljetimdi, sapaly ári qaýipsiz dári-dármekti alý quqyǵyna ıe. Men bul jaıynda birneshe márte aıtqan bolatynmyn, bizde dári óndirisinde qandaı da bir monopolııa bar», - dep toqtaldy Elbasy QR Parlamenti palatalarynyń birlesken otyrysynda.
Osy oraıda Prezıdent farmatsevtıkalyq fabrıkany salýǵa nıetti ınvestorlar kelgen kezde kedergiler týyndaı bastaıtynyn synǵa aldy.
«Barlyq jerde kedergiler qoıylady. Nege? Sebebi jetkizýshiler men osynda qabyldaıtyndardyń qurylymy qalyptasty. Bul salada qandaı da bir aıyrma bar jáne osydan ketetin oılary joq. Birtanovqa (QR Densaýlyq saqtaý mınıstri - avtor) bul máselege qatysty tıisti sheshim jasaýdy tapsyrǵan bolatyn. Meniń oıymsha, ol durys qadamdar jasap jatyr, alaıdy bul isti sońyna deıin jetkizý kerek», - dedi N. Nazarbaev.
Sonymen qatar Memleket basshysy óńirlerdegi medıtsınalyq mekemelerde jumys istemeı turǵan jabdyqtar máselesine nazar aýdardy.
«Jańa jabdyqtar oblystarda esh qyzmet kórsetpesten paıdalanylmaı jatyr. Olardy kezinde qajet dep bıýdjetti qarastyrý barysynda aldy, al keıinnen ıgerilmeı qaldy. Sebebi onyń barlyǵy aldyn ala pysyqtalmady»,-dedi Prezıdent.
Bul turǵyda Elbasy Densaýlyq saqtaý mınıstrine atalǵan salada qordalaǵan máselelerdi retke keltirip, osy jaıynda keıinnen egjeı-tegjeıli baıandap berýdi tapsyrdy.
